Ijtimoiy tarmoqlarda “Sholikor”da elektr toki yordamida baliq ovlangani toʻgʻrisida xabarlar keng tarqaldi. Mazkur holat yuzasidan Ekologiya, atrof-muhitni muhofaza qilish va iqlim oʻzgarishi vazirligi munosabat bildirdi.

Maʼlum boʻlishicha, Bekobod tumani “Yangihayot” MFY hududida fuqarolar M.U. hamda A.S. tomonidan “Sholikor” zovurida noqonuniy ov quroli, yaʼni elektr qarmoqdan foydalangan holda 1 dona “Kumush tovon baligʻi” noqonuniy ovlanganligi aniqlangan.

Ushbu holat natijasida Oʻzbekiston Respublikasi “Ov qilish va ovchilik xoʻjaligi toʻgʻrisida”gi qonunining 3, 27-moddalari, “Hayvonot dunyosini muhofaza qilish va undan foydalanish toʻgʻrisida”gi qonunning 34, 35-moddalari, “Tabiatni muhofaza qilish toʻgʻrisida”gi qonunning 49-moddasi talablari buzilgan.

Mazkur qonunbuzilish holati oqibatida hayvonot dunyosiga yetkazilgan zarar miqdori, Oʻzbekiston Respublikasi Vazirlar Mahkamasining 80-son qaroriga asosan, 8 million 240 ming soʻmni tashkil etgan. Hujjatlar holatga huquqiy baho berish va tegishli chora koʻrish maqsadida Bosh prokuraturaga yuborilgan.