Navroʻz bayrami arafasida Samarqand shahrida “Doʻstlik va nodavlat notijorat tashkilotlari uyi” binosi foydalanishga topshirildi.

Mazkur binoda viloyatda faoliyat yuritayotgan 11 ta milliy madaniy markaz va nodavlat-notijorat tashkilot vakillari uchun barcha qulayliklar mavjud. Jumladan, turli millat va elat vakillarining milliy tadbirlarini tashkil etish uchun ham sharoitlar yaratilgan. Buning uchun 5 milliard soʻm mablagʻ sarflandi.

Madaniy markazlar va NNT xodimlari uchun avtobus ham berildi.

Tadbirda viloyat hokimi Erkinjon Turdimov, Oliy Majlis huzuridagi parlament komissiyasi raisi Adham Shodmonov, Nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash jamoat fondi direktori Otabek Husanov, Oʻzbekiston Nodavlat notijorat tashkilotlari milliy assotsiatsiyasi Kengash raisi Kamoliddin Ishonxoʻjayev, Millatlararo munosabatlar va xorijiy mamlakatlar bilan doʻstlik aloqalari qoʻmitasi raisining oʻrinbosarlari Azamat Toshev va Valeriy Tyan ishtirok etdi.

Bundan tashqari Samarqand shahrining Qorasuv massivida harbiylar uchun qurib bitkazilgan zamonaviy 5 qavatli uylarning kalitlari oʻz egalariga topshirildi.

Zamonaviy va shinam uylar 2 va 3 xonadan iborat. Endilikda u yerda 45 nafar harbiy xizmatchi va ularning oila aʼzolari istiqomat qiladi.

Tantanali ochilish marosimida okrug qoʻmondoni, viloyat hokimligi vakillari, pudratchi va quruvchilar, xonadon egalari va ularning yaqinlari ishtirok etdi.

Shuningdek, Samarqand garnizonidagi harbiy qismda 620 oʻrinli Madaniyat markazi ham okrug qoʻmondonligi va viloyat hokimligi vakillari ishtirokida foydalanishga topshirildi.

Abdulaziz Yoʻldoshev
(Xalq soʻzi)