Foto: The Daily Aus

Avstraliya bosh vaziri Entoni Albaneze mamlakat sentyabr oyida Falastin davlatini rasman tan olishini maʼlum qildi. Uning soʻzlariga koʻra, bu haqdagi bayonot Nyu-Yorkda boʻlib oʻtadigan BMT Bosh Assambleyasi yigʻilishida eʼlon qilinadi.

“Ikki davlat tamoyili — Yaqin Sharqdagi zoʻravonlik aylanasini buzish, Gʻazodagi mojaro, azob-uqubatlar va ocharchilikka barham berish uchun eng toʻgʻri yoʻl”, — dedi Albaneze Kanberradagi matbuot anjumanida.

Avstraliyaning bu qadami Kanada, Fransiya va Buyuk Britaniya kelasi oyda BMTga aʼzo davlatlarning koʻpchiligiga qoʻshilib, Falastinni rasman tan olishga tayyorgarlik koʻrayotgan paytga toʻgʻri kelmoqda.

Bayonot Sidneyda yuz minglab odamlar Isroilning Gʻazo sektordagi urush siyosatiga qarshi yirik namoyish oʻtkazganidan bir hafta oʻtib berildi. Namoyishda qatnashganlar sanksiyalar joriy etish va Isroil bilan qurol savdosini toʻxtatishni talab qilishgan.

Avstraliya tashqi ishlar vaziri Penni Vong ham Falastinni tan olish boʻyicha xavf yoʻqligini taʼkidladi. Shu bilan birga, muxolifatdagi Liberal partiya bu qarorni tanqid qilib, Avstraliya oʻzining eng yaqin ittifoqchisi — AQSH bilan munosabatlariga salbiy taʼsir koʻrsatishi mumkinligini bildirdi.

Parlamentdagi toʻrtinchi yirik siyosiy kuch — “Yashillar” partiyasi esa Falastinni tan olish tashabbusini qoʻllab-quvvatladi. Partiya vakillari Avstraliyaning Isroil bilan qurol savdosini toʻxtatishi va sanksiyalar joriy etishini talab qilmoqda.

Albanezening taʼkidlashicha, Falastin xalqining oʻz davlatini tuzish huquqini tan olish Avstraliyaning Falastin maʼmuriyatidan olgan majburiyatlariga asoslanadi va bu qadam falastinliklarga HAMAS taʼsiridan holi ravishda oʻz taqdirini belgilash imkonini beradi.

Yangi Zelandiya ham qaror arafasida

Yangi Zelandiya tashqi ishlar vaziri Uinston Piters mamlakat sentyabr oyida Falastin davlatchiligini tan olish yoki olmaslik boʻyicha rasmiy qaror qabul qilishini bildirdi. Uning soʻzlariga koʻra, bu masalada turli siyosiy kuchlar oʻrtasida turli qarashlar mavjud va hukumat barcha fikrlarni inobatga oladi.

Gʻazodagi vaziyat

Isroilning Gʻazoga qarshi harbiy harakatlari ogʻir oqibatlarga olib kelmoqda. Mahalliy sogʻliqni saqlash idoralari maʼlumotiga koʻra, urush boshlanganidan beri kamida 61 430 kishi halok boʻlgan, 200 ga yaqin odam, jumladan 96 bola ochlikdan vafot etgan.

BMT maʼlumotlariga koʻra, 193 aʼzo davlatdan 147 tasi Falastin davlatini allaqachon tan olgan. Bu dunyo mamlakatlarining toʻrtdan uch qismi degani. Biroq 1947-yilda BMT tasdiqlagan Falastinni boʻlish rejasi haligacha amalga oshmagan.