AQSH prezidenti Donald Tramp Eronning yadro quroli yaratishga juda yaqin ekani haqida bayonot berganiga qaramay, AQSH Milliy razvedkasi bunday faoliyat boʻlayotganini tasdiqlovchi hech qanday dalil topmagan. Bu haqda MSNBC telekanalida Senatning razvedka boʻyicha maxsus qoʻmitasi raisi oʻrinbosari, demokrat senator Mark Uorner maʼlum qildi.

Unga koʻra, Milliy razvedkaning ikki kun oldin Senatga taqdim etgan hisobotida Eron tomonidan yadro quroli ustida ish olib borilayotgani aniqlanmagan. Senator Uorner 25-mart kuni Milliy razvedka direktori Tulsi Gabbrad tomonidan berilgan yozma bayonotga tayanib, “Eron bomba tayyorlash boʻyicha hech qanday harakat qilmagan”ini eslatdi.

“Bu hafta dushanba kuni ham xuddi shunday razvedka maʼlumotlari tasdiqlandi. Biroq prezident hamon bu maʼlumotlarga eʼtibor bermasdan, oʻz siyosatini tvitlar orqali yuritmoqda”, — dedi senator. U Trampning ushbu masalada razvedka xulosalarini inkor etayotganini tanqid qildi.

Gabbrad mart oyidagi bayonotida AQSHning 18 ta razvedka idorasi umumlashtirgan xulosalarni keltirgan edi. Unga koʻra, Eron yadro quroli yaratmayapti, va mamlakat diniy rahnamosi Oyatulloh Xomanaiy bu yoʻnalishdagi dasturini 2003-yilda toʻxtatgan va uni qayta boshlashga ruxsat bermagan.

Donald Tramp esa shu kuni jurnalistlar savollariga javoban Eronga nisbatan tanqidiy fikrlarini davom ettirib, “Ular yadro quroliga juda yaqin edilar. Men bu fikrimni 20-yildan beri aytib kelyapman va hozir ham shu fikrdaman”, dedi. Tramp razvedka maʼlumotlariga zid ravishda Eronni bir necha hafta ichida yadro quroliga ega boʻlishga yaqin deb hisoblaydi.

NBC, ABC va The Wall Street Journal nashrlarining xabarlariga koʻra, Tramp maʼmuriyati Eronga qarshi zarba berish rejasini muhokama qilgan va prezident ushbu zarbalarni dastlabki tarzda maʼqullagan. Biroq u hali ham Tehron bilan muzokaralar oʻtkazish eshiklarini yopmaganini bildirgan.

Eron esa yadro qurolini yaratish niyati borligini inkor etishda davom etmoqda. Shu bilan birga, Xalqaro atom energiyasi agentligi (MAGATE) ham Eronning yadro quroli yaratish ustida tizimli faoliyat olib borayotganini tasdiqlovchi dalillar yoʻqligini bildirdi.

Shu bilan birga, Grossi Eronning 60 foizgacha uran boyitayotgan yagona davlat ekani xavotir uygʻotishini taʼkidladi. Bu koʻrsatkich boʻyicha alohida eʼtibor qaratilayotganiga qaramay, agentlik Eron yadro quroli ishlab chiqarmoqda degan xulosaga kelmaganini qayd etdi. Boshqa tomondan, Grossi Isroilning Erondagi yadro obyektlariga hujumlari yadro moddalarining atmosfera orqali tarqalish xavfini tugʻdirayotganidan ham ogohlantirdi.