Raqobat qoʻmitasining Andijon viloyati hududiy boshqarmasi 3 ta don korxonasiga nisbatan moliyaviy jarima qoʻlladi. Bu haqda qoʻmita axborot xizmati xabar berdi.

Maʼlum qilinishicha, ushbu korxonalar yuqori likvidli va monopol turdagi mahsulotlarning birja savdolari orqali realizatsiya qilinishida manipulyatsiya harakatlarini (grafiklarni bajarmaslik va kunlik belgilangan hajmlarda mahsulotlarni birja savdolariga qoʻymaslik) sodir etganlik holatlari aniqlandi.

Jumladan:

“Qoʻrgʻontepa don mahsulotlari” AJ — 724,2 tonna bugʻdoy uni va omixta yem mahsuloti;

“Asaka don mahsulotlari” AJ — 1394,0 tonna bugʻdoy uni va omixta yem mahsuloti;

“Andijondonmahsulot” AJ — 509,2 tonna bugʻdoy uni mahsuloti.

Yuqoridagilarga muvofiq, hududiy boshqarma maxsus komissiyasi tomonidan “Raqobat toʻgʻrisida”gi qonun va Vazirlar Mahkamasining tegishli qarori bilan tasdiqlangan nizom talablari asosida don korxonalariga nisbatan qonun buzilish alomatlari bilan ish qoʻzgʻatilib, natijasi yuzasidan moliyaviy jarima qoʻllash haqida qaror qabul qilindi.

Shuningdek, qonunbuzilishi holatlarini bartaraf etish va kelgusida yoʻl qoʻymaslik toʻgʻrisida koʻrsatmalar berildi, deyiladi qoʻmita axborotida.