Andijon viloyatidan tadbirkor va ishbilarmonlardan iborat delegatsiya Turkiya Respublikasida rasmiy safar bilan boʻlib turibdi. Safar doirasida Andijon viloyati hokimi Shuhratbek Abdurahmonov Istanbul viloyati hokimi Davut Gul bilan uchrashuv oʻtkazdi.

Muzokaralar chogʻida ikki hudud oʻrtasidagi hamkorlikni yanada mustahkamlash, xususan, savdo-iqtisodiy, madaniy-gumanitar hamda investitsiyaviy aloqalarni kengaytirish masalalari atroflicha muhokama qilindi. Hududlar oʻrtasida toʻgʻridan-toʻgʻri hamkorlik mexanizmlarini yoʻlga qoʻyish orqali oʻzaro munosabatlarni tizimli va samarali rivojlantirish zarurligi taʼkidlandi.

Shuningdek, bunday hamkorlik savdo aylanmasini oshirish, qoʻshma investitsiya loyihalarini amalga oshirish, ilgʻor texnologiyalarni joriy etish, shuningdek, kadrlar tayyorlash va tajriba almashinuvini kengaytirishga xizmat qilishi qayd etildi.

Uchrashuv yakunida tomonlar oʻzaro manfaatli hamkorlikni izchil davom ettirish, qoʻshma tashabbus va loyihalarni qoʻllab-quvvatlashga tayyor ekanliklarini bildirdilar.

Saminjon HUSANOV, “Xalq soʻzi”.