Kecha, 14-oktyabr kuni Afrika mintaqasida Jahon chempionati saralashining soʻnggi tur oʻyinlari boʻlib oʻtdi. Unga koʻra, Senegal va Kot-dʼIvuar terma jamoalari Jahon chempionati masalasini ijobiy hal etdi.

Saralashning “B” guruhi doirasida ishtirok etgan Senegal terma jamoasi soʻnggi turni oʻz maydonida Mavritaniya termasiga qarshi oʻtkazdi. Oʻyin 4:0 hisobida maydon egalari gʻalabasi bilan yakunlandi.

Ushbu gʻalaba evaziga Senegal terma jamoasi 24 ochko toʻplab, guruhdagi asosiy raqibi Kongo Demokratik Respublikasi terma jamoasidan 2 ochkoga oʻtib ketdi va mundial masalasini ijobiy hal qildi.

Kot-dʼIvuar terma jamoasi esa saralashning “F” guruhida ishtirok etdi. Jamoa soʻnggi turda oʻz maydonida Keniya terma jamoasini 3:0 hisobi bilan magʻlub etdi.

Ushbu gʻalaba evaziga Didye Drogbaning vatandoshlari guruhdagi asosiy raqibi Gabon termasidan 1 ochkoga ilgarilab ketdilar va Jahon chempionati yoʻllanmasini qoʻlga kiritdilar.

Maʼlumot uchun, oldinroq Afrikadan Misr, Jazoir, Tunis, Marokash, Janubiy Afrika Respublikasi, Gana va Kabo-Verde terma jamoalari mundialga yoʻl olgandi.