Arxiv foto

Afgʻonistonning 15 viloyatida ommaviy axborot vositalarida tirik mavjudotlar koʻrsatilishi taqiqlangan. Bu haqda Afgʻoniston jurnalistika markazi (AJM) xabar tarqatdi.

“Bomiyon shahrida Ezgulikni targʻib qilish va illatlarning oldini olish vazirligining 2025-yil 18-apreldan boshlab tegishli qonunga muvofiq tirik mavjudotlar tasvirini suratga olish va efirga uzatish taqiqlanishi haqida rasmiy koʻrsatma chiqardi”, — deyiladi manbada.

AJM qoʻlida boʻlgan hujjatda mahalliy davlat idoralariga jurnalistlarga hech qanday sharoitda ham tadbir va yigʻinlarda suratga tushishga ruxsat bermaslik haqida koʻrsatma berilgan. Jismoniy shaxslarga ham odamlarni suratga olish qatʼiyan man etiladi.

“Direktivada har qanday qoidabuzarliklar qonuniy choralar koʻrilishi aniq koʻrsatilgan”, — dedi AJM xabarida.

Markazning qoʻshimcha qilishicha, bunday taqiq amalda boʻlgan viloyatlarda telekanallar radio formatida ishlashga oʻtgan. Qolganlarida esa teleekranda tabiat suratlari yoki davlat muassasasi tasviri aks ettirilib, yangiliklar diktorning ovozi bilan birga koʻrsatilmoqda.