Qashqadaryo viloyat musiqali drama teatrida davlat buyurtmasi asosida sahnalashtirilgan “Abul Muin Nasafiy” spektaklining premyerasi boʻlib oʻtdi.

Tarixiy drama janridagi ushbu spektakl taniqli adabiyotshunos olim Nafas Shodmonov asari asosida Oʻzbekistonda xizmat koʻrsatgan artist Valixon Umarov tomonidan sahnalashtirilgan.

Taʼkidlash joiz, Islom dunyosida “Haqiqat qilichi” rutbasi bilan tanilgan allomaning ilmiy-maʼnaviy merosini tadqiq etish, asarlaridagi bugungi kun uchun dolzarb boʻlgan hikmatlarni yosh avlodga yetkazish ustuvor ahamiyatga ega. Shundan kelib chiqqan holda soʻnggi yillarda hukumatimiz tomonidan buyuk bobokalonimizning ilmiy merosini tadqiq va targʻib qilish borasida keng qamrovli ishlar amalga oshirilmoqda.

Qashqadaryo viloyat musiqali-drama teatri ijodiy jamoasi tomonidan sahnalashtirilgan mazkur tarixiy drama ham buyuk bobokalonimiz nomini ayniqsa, yosh avlodga keng tanitish, ilmiy merosini ommalashtirishda yana bir muhim qadam boʻldi.

Spektaklda allomaning ilm izlab Samarqand shahriga borishi, begona shahar, begona orasida chekkan mashaqqatlari sahnaga olib chiqilgan. Rollarni teatrning mahoratli aktyor va aktrisalari maromiga yetkazib ijro etishgan.

Yangi spektakl taqdimotiga madaniyat va sanʼat sohasi vakillari, keng jamoatchilik hamda yoshlar taklif etildi.

Jahongir BOYMURODOV, “Xalq soʻzi”.