Қашқадарё вилоят мусиқали драма театрида давлат буюртмаси асосида саҳналаштирилган “Абул Муин Насафий” спектаклининг премьераси бўлиб ўтди.

Тарихий драма жанридаги ушбу спектакль таниқли адабиётшунос олим Нафас Шодмонов асари асосида Ўзбекистонда хизмат кўрсатган артист Валихон Умаров томонидан саҳналаштирилган.

Таъкидлаш жоиз, Ислом дунёсида “Ҳақиқат қиличи” рутбаси билан танилган алломанинг илмий-маънавий меросини тадқиқ этиш, асарларидаги бугунги кун учун долзарб бўлган ҳикматларни ёш авлодга етказиш устувор аҳамиятга эга. Шундан келиб чиққан ҳолда сўнгги йилларда ҳукуматимиз томонидан буюк бобокалонимизнинг илмий меросини тадқиқ ва тарғиб қилиш борасида кенг қамровли ишлар амалга оширилмоқда.

Қашқадарё вилоят мусиқали-драма театри ижодий жамоаси томонидан саҳналаштирилган мазкур тарихий драма ҳам буюк бобокалонимиз номини айниқса, ёш авлодга кенг танитиш, илмий меросини оммалаштиришда яна бир муҳим қадам бўлди.

Спектаклда алломанинг илм излаб Самарқанд шаҳрига бориши, бегона шаҳар, бегона орасида чеккан машаққатлари саҳнага олиб чиқилган. Ролларни театрнинг маҳоратли актёр ва актрисалари маромига етказиб ижро этишган.

Янги спектакль тақдимотига маданият ва санъат соҳаси вакиллари, кенг жамоатчилик ҳамда ёшлар таклиф этилди.

Жаҳонгир БОЙМУРОДОВ, “Халқ сўзи”.