Moddiy yordam va koʻmakka muhtoj oilalarning bolalarini qishki kiyim-bosh toʻplamlari, maktab formasi va oʻquv qurollari bilan taʼminlash maqsadida 2020-yilning sentyabr oyida aholining quyidagi uch toifasiga bir martalik moddiy yordamlar berilishi koʻzda tutilgan edi:

1. Moddiy yordam va koʻmakka muhtoj oilalarning roʻyxatlariga (“temir daftar”) kiritilgan oilalarning 16 yoshga toʻlmagan bolalariga;

2. Boquvchisini yoʻqotganlik pensiyasi yoki nafaqasini oluvchi oilalarning 16 yoshga toʻlmagan bolalariga;

3. Nogironligi boʻlgan 16 yoshga toʻlmagan bolalarga.

Oʻzbekiston Respublikasi Prezidentining 2020-yilning 26-avgustdagi “Aholini ijtimoiy qoʻllab-quvvatlashga qaratilgan qoʻshimcha chora-tadbirlar toʻgʻrisida”gi PQ—4815-son qaroriga muvofiq, bir martalik moddiy yordam miqdori har bir 16 yoshga toʻlmagan bolalari uchun 500 ming soʻm etib belgilangan.

Moliya vazirligi huzuridagi Pensiya jamgʻarmasi — boquvchisini yoʻqotgan oilalarning voyaga yetmagan farzandlari hamda nogironligi boʻlgan 16 yoshga toʻlmagan bolalariga moddiy yordam pullarining pensiyalarni (nafaqalarni) toʻlash uchun belgilangan muddatda manzilli yetkazilishini taʼminlaydi.

Moliya vazirligi — zarur mablagʻlarni Oʻzbekiston Respublikasi respublika byudjetidan mahalliy byudjetlariga oʻz vaqtida ajratish;

Markaziy bank tijorat banklari bilan birgalikda — moddiy yordam mablagʻlarini tarqatish uchun naqd pul bilan taʼminlash boʻyicha masʼul etib belgilangan.

Har qanday ajratilgan mablagʻlarning oʻz egalariga yetkazib berilishi va toʻgʻri ajratilganligi tekshirib, oʻrganilishi zarur. Chunki, inson omili aralashgan joyda har qanday noxush holatlar yoki noqonuniy va oʻzlashtirish holatlariga yoʻl qoʻyilishi mumkin.

Mazkur Qarorda belgilangan bir martalik moddiy yordam toʻlovlarining manzilli yetkazib berilishi boʻyicha Pensiya jamgʻarmalari va AT “Xalq banki” filiallari masʼul tashkilot hisoblanadi. Davlat Moliyaviy Nazorat Departamenti hamda uning hududiy boshqarmalari shuningdek, hududiy moliya boʻlimlari tomonidan ularning qonuniyligi va oʻz egalariga yetkazib berilganligi oʻrganiladi va tekshiriladi.

Bugungi kunda Respublika boʻyicha bir martalik moddiy yordam oluvchi (farzandlar soni boʻyicha) jami 330 668 nafar fuqarolarga 165 334,0 mln soʻm miqdoridagi mablagʻlar toʻlanishi rejalashtirilgan boʻlib, ushbu mablagʻlar joriy yilning 8-sentyabr kuni Pensiya jamgʻarmasi tomonidan AT “Xalq banki” va boshqa tijorat banklariga toʻliq moliyalashtirildi.

Qaror ijrosini taʼminlash maqsadida Pensiya jamgʻarmasi tomonidan avgust oyida 8 470 nafar nogironlik muddati tugagan bolalarning nogironlik muddatlari va 41 277 nafar sentyabr oyida oʻqishni davom ettirayotgan 16 yoshdan katta boquvchisini yoʻqotgan bolalarning pensiya yoki nafaqa muddatlari uzaytirilib, ketma-ket uch oy davomida vaqtincha uyda yoʻqligi hamda 6 oy muddatda pensiya jamgʻarmasiga kelmagan 403 nafar shaxslarning pensiya yoki nafaqa toʻlovlari toʻxtatilmagani holda joriy oy toʻlov qaydnomalariga kiritildi.

Moliyalashtirilgan mablagʻlardan 116 812,3 mln. soʻmi yoki 71 foizi naqd pul shaklida va 48 521,7 mln.soʻmi yoki 29 foizi esa tijorat banklarda ochilgan bank plastik kartalari orqali oluvchilarni tashkil qiladi. (jadval ilova qilinadi).

Bugungi kunda (15.09.2020-yil) moddiy yordam sifatida toʻlash uchun ajratilgan 165 334,0 mln soʻm miqdoridagi mablagʻlar toʻliq moliyalashtirilgan hamda 162 562,4 mln.soʻmi (98%) fuqarolarga manzilli yetkazib berilishi taʼminlandi.