Iqtisodiyot va moliya vazirligi kelasi yili maktab darsliklari va mashq daftarlari ijarasi uchun ota-onalardan toʻlov undirish rejasidan voz kechdi. Shu tariqa, 2025-yilda maktab darsliklari va mashq daftarlari ijarasi uchun ota-onalardan toʻlov undirilmaydi. Bu haqda Iqtisodiyot va moliya vazirligi maʼlum qildi.

Avvalroq, byudjetnoma loyihasida 2025–2026 oʻquv yilidan boshlab 2–11-sinflarda darslik va mashq daftarlari uchun ijara toʻlovi undirish tizimini joriy etish taklif etilgandi.

“Darsliklar va mashq daftarlarining toʻliq davlat byudjeti hisobidan chop etilishi ota-onalar masʼuliyati pasayib ketishi va darsliklarga nisbatan eʼtiborsiz munosabatda boʻlish holatlarini keltirib chiqarmoqda”, – deya bu taklifni izohlagandi Iqtisodiyot va moliya vazirligi.

Qayd etilishicha, 2024-yilda maktab oʻquvchilari uchun 83,2 mln nusxa darslik va mashq daftarlarini yetkazib berish uchun Davlat byudjetidan jami 1,5 trln soʻm ajratilgan. Bu mablagʻlardan 435,5 mlrd soʻmi (yoki 36 foizi) davriyligi 1-yil hisoblanadigan hamda har yili yangidan chop etiladigan mashq daftarlari uchun yoʻnaltirilgan.

2025-yilda esa 81 mln nusxa darsliklar va mashq daftarlari uchun jami 1,3 trln soʻm mablagʻlarni toʻliq Davlat byudjetidan qoplash koʻzda tutilmoqda.

Eslatib oʻtamiz, maktab taʼlimi tizimida 2022-yildan beri darsliklar uchun ijara puli olinmayapti.