Foto: Illustrativ

Andijon, Toshkent va Buxoro viloyatlarida advokatlar tomonidan amalga oshirilgan noqonuniy harakatlar aniqlandi. Davlat xavfsizlik xizmati, Iqtisodiy jinoyatlarga qarshi kurashish departamenti va huquq-tartibot organlari tomonidan oʻtkazilgan tezkor tadbirlar natijasida bir qator huquqbuzarlik holatlari fosh etildi.

Andijon viloyatida Boʻston tumanida faoliyat yurituvchi advokatlik byurosining advokat stajyori va 1984-yilda tugʻilgan shaxs oʻzaro kelishgan holda, 34 sotix yer maydonini turar-joy sifatida rasmiylashtirib berish evaziga 34 ming AQSH dollari olgan vaqtida ushlangan. Ushbu shaxslar yer kadastri tizimidagi tanishlari orqali hujjatlarni rasmiylashtirishga uringani aniqlangan.

Toshkent shahridagi advokatlik firmasi advokati esa Bektemir tuman prokuraturasi tomonidan jinoyat ishi qoʻzgʻatilgan 4 nafar shaxsni javobgarlikka tortmaslik va qamoq ehtiyot chorasini qoʻllamaslik evaziga 25 ming AQSH dollari talab qilgan. Olmazor tumanida oʻtkazilgan tezkor tadbirda mazkur mablagʻni advokatning tanishi olgan vaqtida qoʻlga olingan.

Buxoro viloyatining Peshku tumanida advokatlik byurosi advokati jinoyat ishlari boʻyicha tuman sudi tomonidan sudlangan shaxsga nisbatan kassatsiya instansiyasida oqlov hukmi chiqarish masalasini hal qilish evaziga 12 ming AQSH dollari olganligi aniqlangan. U tezkor tadbir vaqtida ashyoviy dalillar bilan qoʻlga olingan.

Toshkent viloyatida esa Shayxontohur tumanida faoliyat yurituvchi advokatlik byurosi ishchisi ichki ishlar organlari tergov boʻlimidagi jinoyat ishini tugatishga yordam berish evaziga 10 ming AQSH dollari olgan. U bu mablagʻni 1993-yilda tugʻilgan tanishi orqali olgan va tezkor tadbir davomida qoʻlga tushgan. Bundan tashqari, u avvalroq SPA-salon boshqaruvchisidan 4500 AQSH dollari olgani ham maʼlum boʻldi.

Hozirda barcha holatlar yuzasidan jinoyat ishlari qoʻzgʻatilib, tergov harakatlari olib borilmoqda. Huquq-tartibot organlari advokatlarning qonunga xilof harakatlarini bartaraf etish boʻyicha chora-tadbirlarni kuchaytirmoqda.