Foto: president.uz

Prezident huzurida elektrotexnika sohasida yangi zaxiralarni safarbar qilish boʻyicha yigʻilish boʻlib oʻtmoqda. Bu haqda Prezident matbuot kotibi Sherzod Asadov xabar berdi.

Yigʻilishda kelgusi uch yilda tarmoq uchun 4 ming nafar oliy va 14 ming nafar oʻrta maʼlumotli mutaxassislar zarur boʻlishi taʼkidlandi.

Misol uchun, birgina Samarqandda ishga tushiriladigan korxonalarda 2022-yilda 1 ming 200 nafar mutaxassisga ehtiyoj mavjud.

Shuning uchun Toshkent shahridagi Radiotexnika kolleji, Samarqand va Chirchiq xizmat koʻrsatish texnikumlari, Fargʻona elektrotexnika kolleji «Oʻzeltexsanoat» uyushmasiga biriktirilishi belgilandi.

Bir oy muddatda Toshkent davlat texnika universiteti va boshqa oliygohlarning elektrotexnika boʻyicha oʻquv dasturlarini toʻliq qayta koʻrib chiqish topshirildi.

Yigʻilish yakunida muhokama qilingan masalalar yuzasidan tarmoq va hududlar rahbarlarining hisoboti eshitildi.