Qirgʻizistondan narkotik moddalar olib kelib, sotish bilan shugʻullangan jinoiy guruh aʼzolari qoʻlga olindi. Bu haqida “Xavfsizlik” Telegram-kanali xabar berdi.

Unda aytilishicha, Andijon viloyati Qoʻrgʻontepa tumanida yashovchi, 1984–1991-yillar oraligʻida tugʻilgan 6 nafar fuqaro oʻzaro til biriktirib, qirgʻizistonlik narkosavdogardan 2 kg “gashish” moddasini 15 ming AQSH dollariga sotib olishga kelishib, 1 ming 950 AQSH dollarini boshlangʻich badal sifatida unga yetkazib bergan.

Shundan soʻng, Qirgʻiz Respublikasi fuqarosi giyohvandlik vositasini oʻzbek-qirgʻiz davlat chegarasidan kontrabanda yoʻli bilan oʻtkazib, Xonobod shahridagi xufiya joyda qoldirgan.

Qoʻrgʻontepalik ogʻufurushlardan biri esa ushbu giyohvandlik vositasini olib, oʻzining avtomashinasida Xonobod-Qoʻrgʻontepa yoʻnalishida harakatlanayotgan vaqtida Davlat xavfsizlik xizmati xodimlari tomonidan ushlangan.

Tezkor tadbir davom ettirilib, jinoiy guruhning qolgan 5 nafar aʼzosi ham protsessual tartibda qoʻlga olingan.

Ekspertiza xulosasiga koʻra, ushbu “gashish” giyohvandlik vositasining sof ogʻirligi 1 kg 954 gr.ni tashkil qilgan. Hozirda mazkur shaxslarga nisbatan Jinoyat Kodeksining 246-moddasi 2-qismi va 25,273-moddasi 5-qismi bilan jinoyat ishi qoʻzgʻatilib, “qamoq” ehtiyot chorasi qoʻllanilgan.