Dogʻistonda 23-iyun kuni kechqurun Maxachqalʼa va Derbent shahrida qurollangan nomaʼlum shaxslar pravoslav cherkovlari, sinagogalar va yoʻl-patrul xizmati postiga hujum qildi. Oqibatda 15 dan ortiq politsiya xodimi halok boʻldi, jangarilar esa oʻldirildi. Dogʻistonda uch kunlik motam eʼlon qilindi.

Dogʻistonlik mashhur sportchi, sobiq UFC chempioni Habib Nurmagomedov Instagram sahifasiga joylagan postida holatni keskin qoraladi va terakt oqibatida qurbon boʻlganlarning oila aʼzolariga taʼziya izhor qildi.

“Halok boʻlganlarning barcha oila aʼzolari va yaqinlariga hamdardlik bildiraman. Alloh barchamizni bunday holatlardan asrasin, boshimiz uzra tinch osmonimizni bersin”, deydi Nurmagomedov.

Habib shuningdek, ota-onalardan farzand tarbiyasida oʻta ehtiyotkor boʻlishni hamda ulardan mehrini ayamaslikni soʻragan.

“Yaqinlaringizga gʻamxoʻrlik qiling, farzandlaringizning atrofidagilarga va ular kim bilan muloqot qilayotganiga eʼtibor bering. Ruhlarni tarbiyalash tana tarbiyasidan muhimroqdir”, deb yozgan sportchi.

Yana bir dogʻistonlik sport ustasi, yengil vazn toifasida amaldagi UFC chempioni hamda P4P reytingi yetakchisi hisoblangan Islom Maxachev ham ijtimoiy tarmoqdagi sahifasida odamlardan sodir boʻlgan holatni din bilan bogʻlamasliklarini soʻradi.

“Islomda bu kabi gʻayriinsoniy holatlarning barchasi qoralangan va qatʼiyan man etilgan. Bu din begunoh odamlarga zoʻravonlik qilishni, ularning shaʼni yoki mulkiga ziyon yetkazishni taʼqiqlaydi”, degan Maxachev.

Uning qoʻshimcha qilishicha, insonga hech narsa qon toʻkish huquqini bermaydi, sportchi shu sababdan vaziyatni Islom dini bilan bogʻlamaslikni soʻragan.