Украина президенти Владимир Зеленский давлат раҳбари лавозимига бўладиган сайловларда иштирок этишга тайёр эканини билдирди. Бу ҳақда РБК-Украина хабар берди.

Зеленский Украина ҳукумати «креслога ёпишиб олган» деган даъволарни ноўрин деб атади ва урушнинг тугамаётганини бунга боғлаш мутлақо нотўғри эканини таъкидлади. Унинг айтишича, сайловлар фақат фуқаролар учун хавфсизлик кафолатлари таъминлангандагина ўтказилиши мумкин.

«Сайловларни ўтказиш учун икки муҳим масала бор: биринчиси — хавфсизлик, ракета ҳужумлари остида буни қандай амалга ошириш масаласи. Иккинчиси эса — сайловларни ўтказишнинг қонуний асосини таъминлайдиган норматив-ҳуқуқий база», — деди Зеленский.

Украина президенти АҚШни ва Европадаги ҳамкорларни овоз бериш жараёни учун зарур шароитларни яратишга кўмаклашишга чақирди.

«Мен сайловга тайёрман. Ҳатто кўпроқ — АҚШдан, имкон бўлса Европа Иттифоқидаги ҳамкорлар билан бирга, сайловларни ўтказиш учун хавфсизликни таъминлаб беришни сўрайман. Шунда 60–90 кун ичида Украина сайловларга тайёр бўлади», — деди у.

Зеленский, шунингдек, парламент депутатларини ҳарбий ҳолат шароитида сайловларни ўтказиш тартибига оид қонунчиликни такомиллаштириш бўйича таклифлар тайёрлашга чақирди. У тегишли ташаббуслар яқин кунларда тайёр бўлишини кутаётганини айтди.

«Эртага мен Украинада бўламан. Ҳамкорлардан ва депутатлардан таклифларни кутаман ва сайловга чиқишга тайёрман», — дея қўшимча қилди Зеленский.

Бундан аввал АҚШ президенти Доналд Трамп Украинада президентлик сайловларини ўтказиш лозимлигини айтган эди.

«Менимча, вақт келди. Бу сайловларни ўтказиш учун ниҳоятда муҳим палладир. Улар урушни сайлов ўтказмаслик учун баҳона қилмоқда, аммо украин халқи ўз танловига эга бўлиши керак. Балки Зеленский ғолиб бўлар», — деган эди Трамп Politico нашрига берган интервьюсида.