Украина президенти Владимир Зеленский Михаил Федоровни мамлакатнинг янги мудофаа вазири лавозимига тайинлаш таклифи билан чиқди. Агар Олий Рада ушбу номзодни маъқулласа, Федоров Зеленский президентлиги давомида тайинланган еттинчи мудофаа вазирига айланади.

34 ёшли Михаил Федоров айни пайтда Украина Бош вазирининг ўринбосари ҳамда рақамли трансформация вазири лавозимларида фаолият юритиб келмоқда. У 2019 йилдан буён Зеленский жамоасида ишлаб, ҳукуматдаги барча кадрлар алмашинувларидан кейин ҳам ўз лавозимини сақлаб қолган ягона вазир ҳисобланади. Федоров президентнинг энг яқин ва ишончли иттифоқчиларидан бири сифатида танилган.

Унинг мудофаа вазири лавозимига таклиф этилиши 2 январь куни мамлакат раҳбариятида амалга оширилган кенг кўламли кадрлар ўзгаришлари, жумладан, разведка идораларидаги алмашинувлар фонида маълум қилинди.

Зеленский ўз танловини изоҳлар экан, Федоровнинг Украинанинг «дронлар флоти»ни шакллантириш ва рақамли ҳарбий ечимларни ривожлантиришдаги фаол иштирокига алоҳида эътибор қаратди.

«Ҳарбийлар, армия қўмондонлиги, қурол ишлаб чиқарувчилар ҳамда Украина шериклари билан биргаликда мудофаа соҳасида аниқ натижалар берувчи ўзгаришларни амалга оширишимиз керак», — дейди Зеленский.

Маълумотларга кўра, Михаил Федоров ушбу лавозимда олти ойга яқин фаолият юритган Денис Шмигал ўрнини эгаллаши кутилмоқда. Зеленскийнинг таъкидлашича, Шмигал ҳукуматда бошқа лавозимга тайинланади.