Ватикан интернет тармоқларида бериб борилаётган электрон китоблар орасида турк шоири Юнус Эмронинг шу пайтгача маълум бўлмаган 200 шеърдан иборат янги девони тақдим этилди.

Ватикан кутубхонаси бир муддат аввал рақамли турк қўлёзмалари коллекцияларини электрон шаклда сайтига жойлар экан Меҳмет Акиф Эрсой Университетининг Янги турк адабиёти факультети мутахассиси, филология фанлари доктори Ҳиммат Буке Юнус Эмрога оид тахминан 200 шеърдан иборат янги бир девон топилганини эълон қилди.

Ҳиммат Буке ўз сўзида топилган янги девон 2 китобга бўлиниб яқин ойлар ичида чоп қилинишини қайд этди.

Қуйида Раҳмат Бобожон таржимасида Юнус Эмро ҳикматлари ва шеърларидан тақдим этамиз.

* * *

Хушдир менга сендан келган неки бор: Ё бир гулдир, ёхуд тикан. Ё ҳаётдир, ёхуд кафан. Инон, зулматинг ҳам хушдир, нуринг ҳам. Қаҳринг ҳам хушдир, меҳринг ҳам.

* * *

Ҳеч қандай хато қилмаган одам, ҳеч нима қилмаган одамдир. Бу ҳаётдаги энг катта хато: ўзингни хатосиз ҳисобламоқдир.

* * *

Кўп мол ҳаромсиз, кўп сўз ёлғонсиз бўлмас.

* * *

Анинг кўркли назари кўнгиллар ойнасидир.

* * *

Борсанки унутма Яратган ёрдир,

Санама золимнинг билгани дордир,

Мазлумнинг оҳлари йиқитар шоҳни,

Билки, ҳар нарсанинг ўз вақти бордир.

* * *

Кўзим Сени кўрмоқ учун, қўлим Сенга бермоқ учун,

Бугун жоним йўлда қўйдим, эрта Сенинг бўлмоқ учун.

Бугун жоним қўйсам йўлга, эрта ҳаққини берурсан,

Арз айлама Учмоҳингдан, ҳеч орзум йўқ Учмоҳ учун.

Менга Учмоҳ нега керак, ҳаргиз кўнглим боқмас унга,

Қилган бори фиғонларим, эмасдурур бир боғ учун.

Учмоҳ Учмоҳим деганинг, мўминларни чорлаганинг,

Бир уй ила нечадир ҳур, ҳавасим йўқ қучмоқ учун.

Бунда ҳатто бердинг бизга, ул ҳурлардан жуфту ҳалол,

Ундан ҳатто кечти орзум, орзум Сени кўрмоқ учун.

Сўфийларга бер эсдалик, менга Сенинг керак сени,

Мен неча тарк этсам сени, шул бир сокин чортоқ учун.

Юнус ҳасратдурур сенга, ҳазратини кўрсат унга,

Ишинг зулм эмас ахир, фарёд айла бормоқ учун.

* * *

Тоғлар ила, тошлар ила, чорлагайман Мавлом сани,

Саҳарларда қушлар ила, чорлагайман Мавлом сани.

Сув юзида моҳи ила, саҳроларда оҳу ила,

Абдол ўлиб «Ё, Ҳу» ила, чорлагайман Мавлом сани.

Осмондаги Исо ила, Тур тоғинда Мусо ила,

Қўлимдаги асо ила, чорлагайман Мавлом сани.

Дарди битмас Айюб ила, кўзлари ёш Яъқуб ила,

Ул Муҳаммад маҳбуб ила, чорлагайман Мавлом сани.

Ҳамду шукруллоҳ ила, васфи Кулҳуваллоҳ ила,

Ҳар он зикруллоҳ ила, чорлагайман Мавлом сани.

Билмай бу дунё ҳолин, тарк этдим қийлу қолин,

Бош очиқ, оёқ ёланг, чорлагайман Мавлом сани.

Юнус ўқур диллар ила, ул қумри, булбуллар ила,

Ҳақни севган қуллар ила, чорлагайман Мавлом сани.

Турк тилидан
Раҳмат Бобожон
таржимаси