Ботир МАДИЁРОВ/«Халқ сўзи». Шу кунларда Ёзёвон туманида Фарғона водийсида биринчилардан бўлиб пилла йиғим-терими ишларига киришилди. Фарғона вилояти ҳокими Хайрулло Бозоров туман пиллакорлари меҳнати билан танишиб, сўнгги уч йил мобайнида мамлакатимизда биринчилар қаторида режани уддалаётган ёзёвонлик пиллакорлар ютуқларини юксак эътироф этди.

«Ёзёвон агропилла» МЧЖ раҳбари Оишахон Ибрагимованинг қайд этишича, жорий йилда туманда 130 тонна чилги ҳосил йиғиб олинади. Шу мақсадда 10 та инкубаторияда 2145 қути ипак қурти уруғи ундирилиб, интенсив технологиялар ёрдамида парваришланди. Шу кунларда йиғим-терим ишлари уюшқоқлик билан давом этмоқда.

— «Нурли тонг силк» пиллачилик кластери билан касаначилик шартномаси имзолаб, 16 қути ипак қурти парваришладик, — дейди «Сувлиариқ» МФЙда истиқомат қилувчи Алижон Фозилов. — Ипак қурти тўлиқ плёнка остида парваришланди. Бу озуқа базасини тежаш, ҳосил сифати ва салмоғини ошириш имконини бермоқда. Ҳар бир қутидан ўртача 70 килограмм саноат хомашёси териб олмоқдамиз. Бу йил ҳосил салмоғини 1 тоннадан оширишни мақсад қилганмиз.

Пиллачилик кластери томонидан 1 кг пиллага 40 минг сўмдан пул бериладиган бўлди. Бу оиламиз учун чилги ҳосил даромади.