Фото: AFP

Исроил ҳукумати Ғазо секторини тўлиқ ҳарбий оккупация қилиш режасини тасдиқлашга яқин турибди. Бу ҳақда маҳаллий Ynet нашри хабар берди.

«Қарор қабул қилинди – биз Ғазо секторини тўлиқ эгаллаш сари кетмоқдамиз», — дея келтиради нашр ҳукуматдаги манбаларнинг сўзларини.

Хабарда айтилишича, бош вазир Биньямин Нетаньяху яқин орада ҳарбийларга Ғазони тўлиқ босиб олиш бўйича буйруқ бериш таклифини ҳукумат муҳокамасига қўйиши мумкин.

Бироқ бу ташаббусга қарши бўлганлар ҳам бор: жумладан, Исроил армияси Бош штаби раҳбари генерал Эяль Замир ва бошқа ҳарбий етакчилар ушбу қарорга норозилик билдирган. Шунга қарамай, ҳукумат расмийлари ҳарбийлар фикрини инобатга олмасликка тайёр эканини билдирган.

«Зарурат туғилса, гаровдагилар сақланаётган ҳудудларда ҳам жанговар операциялар олиб борилади. Бу бош штаб бошлиғига ёқмаса, истеъфога чиқиши мумкин», — деган исми ошкор қилинмаган амалдор.

Нашрга кўра, Исроил сиёсий раҳбарияти гаровга олинганларни дипломатик йўл билан озод қилиш эҳтимоли деярли қолмаганини тан олган. Музокаралар боши берк кўчага кириб қолгани сабабли, ҳарбий йўл тутиш режасига устувор аҳамият берилмоқда.