Бирлашган Миллатлар Ташкилоти Бош Ассамблеясининг 80-сессиясида Ўзбекистон Республикаси Президенти Шавкат Мирзиёевнинг қилган нутқи нафақат юртимиз, балки бутун дунё ҳамжамияти учун муҳим сиёсий воқеа бўлди. Ушбу нуфузли минбарда янграган фикрлар, таклиф ва ташаббуслар — янги давр, янги Ўзбекистоннинг қатъий позицияси, мустаҳкам мақсадлари ва жаҳон билан ҳамжиҳатликда яшашга бўлган интилишининг ёрқин ифодасидир.

Президентимиз ўз нутқида бугунги кундаги глобал вазиятнинг жиддий ва мураккаблигини аниқ таърифлади. Дунё бетинч, халқаро муносабатларда қарама-қаршиликлар кучаймоқда, заиф ва бой давлатлар ўртасидаги тафовут кескин ортиб бормоқда. Ана шундай оғир шароитда, Ўзбекистон томонидан билдирилаётган ташаббуслар ўта долзарб ва ҳаётий аҳамиятга эгадир.

Шавкат Мирзиёевнинг нутқи — бу сиёсий мурожаат эмас, балки ўзгаришларнинг амалий дастури, инсонпарвар, тинчликсевар ва ҳамжиҳат сиёсатнинг мукаммал намоёнидир. Унда нафақат мамлакатимизнинг ички ислоҳотлари, балки бутун инсоният учун долзарб бўлган масалалар — камбағаллик, таълим, соғлиқни сақлаш, гендер тенглиги, экологик муаммолар ва глобал хавфсизлик каби кенг қамровли йўналишларга эътибор қаратилди.

Айниқса, мамлакатимиздаги ижтимоий-иқтисодий ислоҳотлар борасидаги натижалар фахр билан тилга олинди. Камбағаллик даражасининг қисқариши, таълим қамровининг кенгайиши, мактабгача ва олий таълим соҳаларидаги улкан ўсишларнинг барчаси аҳоли фаровонлигини таъминлашга қаратилган изчил ва қатъий сиёсат самарасидир. Президентимиз таълимни ислоҳ қилиш, ўқитувчилар нуфузини ошириш, инновацион саноат тармоқларини ривожлантириш орқали ёшлар учун кенг имкониятлар эшигини очиб, келажак авлодни салоҳиятли ва билимли этиб тарбиялашга алоҳида эътибор қаратмоқдалар.

Айни пайтда, халқаро ҳамжамият учун таклиф этилган ташаббуслар Ўзбекистоннинг глобал савиядаги масъулиятли ва фаол иштирокчисини яққол намоён этади. Афғонистонда тинчлик ўрнатиш, Марказий Осиёнинг барқарор иқтисодий ривожи, сув ва иқлим муаммолари, “яшил” энергетика, сунъий интеллект, трансчегаравий ҳамкорлик, экологик хавфсизлик, ёшлар тарбияси ва бағрикенглик — буларнинг барчаси Янги Ўзбекистон ислоҳотларининг ташаббусида бор.

Нутқнинг ўзига хос жиҳати шундаки, у ҳеч қандай популизмга берилмасдан, ҳар бир масалага ҳаётбахш ечим таклиф қилади. Афғон муаммосига бефарқ қарамаслик, Ғазо ва Украинадаги можароларга нисбатан тинчлик ва сиёсий музокараларни устувор деб билиш Ўзбекистон ташқи сиёсатида инсонпарварлик ва мувозанат асосий мезон эканини кўрсатади. Президентимиз томонидан тақдим этилган “Жаҳон ёшларининг тинчлик сари ҳаракати” ташаббуси эса нафақат минтақамиз, балки дунё бўйлаб тинчлик ғояларини ёшлар қалбига сингдиришда янги саҳифа очиши мумкин.

Шу билан бирга, Ислом маърифати ва ислом цивилизациясига оид бой илмий-маънавий меросимизнинг дунёга танитиш ташаббуси нафақат фахр, балки жавобгарлик ҳамдир. Имом Бухорий, Имом Термизий ва Имом Мотуридий каби буюк мутафаккирлар фаолиятини халқаро миқёсда тарғиб қилиш Ўзбекистоннинг маърифий етакчиликка қадам қўяётганини англатади.

Шавкат Мирзиёевнинг ушбу нуфузли минбардаги нутқи Янги Ўзбекистоннинг нафақат ички тараққиёти, балки халқаро саҳнадаги фаол, қатъий ва тинчликсевар давлат сифатидаги юксалишини англатади. Ушбу нутқ ҳар биримизда миллий фахр туйғусини оширади, мамлакатимизга нисбатан ишончни мустаҳкамлайди ва келажакка ишонч билан қарашга руҳлантиради.

Биз, халқ вакили сифатида, бундай юксак мақсадларни қўллаб-қувватлашни ўз бурчимиз деб биламиз. Зеро, Президентимиз нутқида янграган ҳар бир фикр мамлакатимиз равнақи, халқимиз фаровонлиги ва бутун инсониятнинг тинчлиги учун жасорат билан айтилган сўзлардир. Ана шундай мустаҳкам сиёсий ирода ва халқаро майдондаги муносиб овоз орқали Янги Ўзбекистон ўз тарихий бурчини адо этмоқда.

Ҳилола ЮСУПОВА, Олий Мажлис Қонунчилик палатаси депутати.