«Барселона»нинг 18 ёшли юлдузи Ламин Ямаль «Олтин тўп» учун бўлган курашда иккинчи ўринни эгаллади. Совринни эса Усмон Дембеле қўлга киритди. Ямалнинг отаси Мунир Насрауи ўғли футбол оламида аллақачон энг зўр эканини таъкидлаб, ўғлининг совринга кўпроқ лойиқ бўлганига ишора қилди.

Насрауи «Марcа» нашрига берган интервьюсида: «Менимча, Ямаль бугунги кунда дунёнинг энг яхши футболчиси ҳисобланади. Буни отаси бўлганим учун эмас, балки у ҳақиқатан ҳам бошқа футболчилардан анча олдинда кетгани учун айтяпман. Ҳозир Ламиннинг рақобатчилари йўқ. Бу ўз-ўзидан энг катта ютуқ. Ўғрилик ҳақида гапирмоқчи эмасман, аммо унга етказилган маънавий зарар ҳақида ўйлаш керак», — деди.

Овоз бериш якунларига кўра «Олтин тўп» Дембелега насиб этган бўлсада, Ямал ҳам совринсиз қолмади. У «France Football» томонидан йилнинг «энг яхши ёш футболчиси»га топшириладиган Копа трофейини қўлга киритди.

2024/25 йилги мавсум Ламин Ямаль учун ажойиб ўтди. У «Барселона» сафида 55 ўйинда майдонга тушиб, 18 та гол урди ва 25 та голли узатма берди. Унинг ҳиссаси билан каталонияликлар Испания чемпионлигини қўлга киритибгина қолмай, мамлакат кубоги ва Суперкубогида ҳам зафар қучди.