Украинанинг «Open4business» ва «Fixygen» электрон нашрларида «Ўзбекистон ноёб металларни қазиб олиш ва қайта ишлаш бўйича 2,6 миллиард АҚШ долларлик лойиҳаларни амалга оширади» сарлавҳали мақолалар рус, украин, инглиз, немис ва испан тилларида эълон қилинди. Бу ҳақида «Дунё» ахборот агентлиги хабар берди.

Маълум қилинишича, бугунги кунда Ўзбекистонда вольфрам, молибден, магний, литий, германий, графит, ванадий ҳамда титан каби 30 дан ортиқ саноат учун муҳим минераллар мавжуд.

«Ўзбекистон Президенти саноат учун муҳим минераллар хомашё базасини кенгайтириш ва қўшилган қийматли маҳсулотлар ишлаб чиқариш бўйича тақдимот билан танишди», – деб ёзилган Украина нашрларида.

Қўшимча қилинишича, келгуси уч йилда 28 та ноёб минерал бўйича 2,6 миллиард долларлик 76 та лойиҳани амалга ошириш мўлжалланмоқда. Бунинг учун хомашё базасини кенгайтириш мақсадида геология-қидирув ва илмий-тадқиқот ишларига қўшимча маблағ ажратиш кўзда тутилган.

Шунингдек, энг асосий вазифа – замонавий технологияларни қўллаб, қиммат хомашёни рудадан ажратиб олиш, софлигини ошириш ва юқори қийматли маҳсулотлар яратиш эканлиги алоҳида таъкидлаб ўтилган.

«Масалан, «Ingichka» конидаги вольфрам концентрати бойитилса, қўшилган қиймат 2 карра ошади. Ҳозирча шу каби 18 та лойиҳа ишлаб чиқилган», – дейилади электрон нашр хабарида.

Бундан ташқари, соҳада «хомашё – қайта ишлаш – илм ва технология – тайёр маҳсулот» занжирини кенгайтириш мақсадида молибден ва вольфрамга бой Тошкент ва Самарқанд вилоятларида технопарклар ташкил қилиш таклифи ҳам билдирилган.