Ирландиялик аралаш яккакураш устаси Конор Макгрегор 2025 йил ноябрь ойидаги Ирландия президентлик сайловларида президентлик учун ўз номзодини илгари сурмоқчи. Бу ҳақида «Newsweek» нашри хабар берди.

Унда айтилишича, UFC жангчиси Ирландия президентлигига сайланса ўз мамлакатининг Европа Иттифоқига аъзо давлатлар ўртасида бошпана изловчиларни тақсимлаш тўғрисидаги битимда иштирок этишига қаршилик кўрсатишга ваъда берган.

«Ирландия 2026 йил 12 июнгача Европа Иттифоқининг миграция битимини тўлиқ амалга ошириши шарт. Шу сабабли, ҳозирдан 2026 йил 12 июнгача Ирландия парламенти иккала палатаси бир нечта қонун ҳужжатларини қабул қилиши ва сўнгра Президент уларни имзолаши керак бўлади», – деб ёзган Макгрегор ўзининг Instagram саҳифасида.

Шунингдек, Макгрегор, ушбу қонун лойиҳасига қаршилик кўрсата оладиган ягона президент бўлишини ҳам қўшимча қилган.

«Кейинги президентлик сайлови 2025 йил 11 ноябргача ўтказилиши керак. Бу қонун лойиҳасига ким қаршилик қилади? Президентлик учун номзодини кўрсатадиган бошқа шахслар ҳеч қандай қаршилик кўрсата олишмайди. Мен эса буни уддалайман», – деган у.

Маълумот учун, Ирландия президенти давлат раҳбари ҳисоблансада, асосан тантанали маросимларни бошқариш вазифаларини бажаради. Давлатни бошқариш эса мамлакат бош вазири зиммасига юклатилади.

Шундай бўлсада, давлат раҳбари ҳамон сезиларли ваколатларга эга бўлиб, Ирландия конституциясини ҳимоя қилиш учун масъул шахс ҳисобланади.

Ирландия конституциясига кўра, мамлакат президентлиги сайловида иштирок этиш учун номзод Ирландия парламентининг камида 20 нафар аъзоси ёки 31 та шаҳар ва вилоят кенгашларининг камида тўрттаси томонидан қўллаб-қувватланиши лозим.

Фақатгина амалдаги ёки собиқ президентлар ушбу бундай қўллашларсиз қайта номзодини қўйишлари мумкин бўлади.

Ҳозирда Ирландия парламентидаги деярли барча қонун чиқарувчи аъзолар аллақачон Макгрегорнинг дастурига қарши бўлган сиёсий партияларга мансуб, шунинг учун уни номзод сифатида кўрсатишлари эҳтимоли жуда паст.

Конор Макгрегор Ирландия парламентининг 20 нафар аъзоси ёки тўртта кенгашдан номзодлик олиш учун катта қийинчиликларга дуч келиши тахмин қилинмоқда. Бошқа номзодлар ҳали эълон қилинмаган бўлсада, Берти Аҳерн ва сенатор Френсис Блек президентлик сайловларига ўз номзодларини қўйиши ойдинлашиб бормоқда.