Учқўрғон туманининг Янгиер маҳалласи ҳудудида фаолият олиб бораётган кўп тармоқли фермер хўжалиги раҳбари Гулҳумор Тоғаева кўплаб хайрли ишларнинг ташаббускори. Куни кеча унинг хўжалиги томонидан қуриб битказилган мактаб интернат фойдаланишга топширилди.

“International School Gulxumor” деб номланган янги муассаса оддий мактаб эмас, хорижий тилларни ўқитишга ихтисослашган. Бу ерда барпо этилган 360 ўринли бинода замонавий таълимнинг барча шароитлари яратилган. Ўқув хоналари, 12 турдаги спорт йўналишларига мўлжалланган комплекс мавжуд. Ёшларни жисмоний чиниқтириш баробарида йирик мусобақалар ўтказиш имкониятига эга.

– Ушбу лойиҳамиз ижроси умумий қиймати 21 миллиард сўмни ташкил этади, – дейди Г.Тоғаева. – Энди қишлоғимиз ёшлари тилни мукаммал ўрганиш учун узоққа бормайди. Уларга жаҳон андозаларида сабоқ бериш учун энг малакали мутахассисларни таклиф этганмиз.

Янги хусусий мактабнинг очилиши “Билимлар куни” тантанасига уланди. Маросимда Наманган вилояти ҳокими “International School Gulxumor” нафақат Учқўрғон тумани, балки бутун вилоятда таълим-тарбия сифатини янги босқичга кўтаришга хизмат қилувчи муҳим лойиҳалиги, келажак авлодни халқаро талабларга мос мутахассислар қилиб тарбиялашга ўз ҳиссасини қўшишини таъкидлади.

Қудратилла НАЖМИДДИНОВ

«Халқ сўзи».