Бош прокуратура ҳузуридаги Департаментнинг Фурқат тумани бўлими томонидан тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган тезкор тадбир давомида валюта айирбошлаш билан шуғулланиб келган У.В. фуқаро М.Х.га 4 минг АҚШ долларини 55,1 миллион сўмга сотган вақтида ашёвий далиллар билан қўлга олинган.

Шу каби яна бир ҳолат департаментнинг Навоий вилояти бошқармаси ва ИИБ ходимлари ҳамкорлигида ўтказилган тезкор тадбирда ҳам аниқланган.

Унга кўра, фуқаро Р.А. фуқаро Ш.С.га 4 минг АҚШ долларини 50 миллион сўмга сотган вақтида ашёвий далиллар билан ушланган.

Бундан ташқари, департаментнинг Кўкдала тумани бўлими томонидан ўтказилган тезкор тадбирда фуқаро Ш.Ҳ. «Хўжаобод» МФЙ ҳудудидаги савдо дўконида фуқаро С.Т.дан 3 минг 800 АҚШ долларини 47,1 миллион сўмга сотиб олган вақтида ашёвий далиллар билан қўлга тушган.

Ҳозирда мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари бошлаб юборилган.