Кучли таъсир қилувчи дори воситалари савдоси билан шуғулланиб келган шахслар ушланди. Бу ҳақида Иқтисодий жиноятларга қарши курашиш департаменти хабар берди.

Унда айтилишича, Бош прокуратура ҳузуридаги Департаментнинг Андижон вилояти бошқармаси ва бошқа ҳуқуқни муҳофаза қилувчи орган ходимлари ҳамкорлигида тезкор тадбир ўтказилган.

Аниқланишича, фуқаро Э.Н. 3,2 млн сўмга 14 дона, фуқаро М.М. 300 АҚШ доллари ва 100 минг сўмга 8 дона «Тропикамид» ва 10 дона «Регапен»номли кучли таъсир қилувчи дори воситаларини сотган вақтида ашёвий далиллар билан қўлга олинган.

Шу каби яна бир ҳолат, Департаментнинг Жалақудуқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда ҳам аниқланган.

Унда фуқаро А.Қ. 13 дона «Регапен» номли дори воситасини 1,1 млн сўмга сотган вақтида ашёвий далиллар билан ушланган.

Бундан ташқари, Департаментнинг Қува туман бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда фуқаро С.А. 24 дона «Зардекс» номли дори воситасини 1,4 млн сўмга сотган вақтида ашёвий далиллар билан қўлга тушган.

Ҳозирда мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.