Kuchli taʼsir qiluvchi dori vositalari savdosi bilan shugʻullanib kelgan shaxslar ushlandi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Andijon viloyati boshqarmasi va boshqa huquqni muhofaza qiluvchi organ xodimlari hamkorligida tezkor tadbir oʻtkazilgan.

Aniqlanishicha, fuqaro E.N. 3,2 mln soʻmga 14 dona, fuqaro M.M. 300 AQSH dollari va 100 ming soʻmga 8 dona “Tropikamid” va 10 dona “Regapen”nomli kuchli taʼsir qiluvchi dori vositalarini sotgan vaqtida ashyoviy dalillar bilan qoʻlga olingan.

Shu kabi yana bir holat, Departamentning Jalaquduq tumani boʻlimi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda ham aniqlangan.

Unda fuqaro A.Q. 13 dona “Regapen” nomli dori vositasini 1,1 mln soʻmga sotgan vaqtida ashyoviy dalillar bilan ushlangan.

Bundan tashqari, Departamentning Quva tuman boʻlimi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbirda fuqaro S.A. 24 dona “Zardeks” nomli dori vositasini 1,4 mln soʻmga sotgan vaqtida ashyoviy dalillar bilan qoʻlga tushgan.

Hozirda mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda.