Фото: ФИФА

2026 йилги Жаҳон чемпионати расмий тўпи намойиш этилди. Мазкур тўп «Adidas» компанияси томонидан ишлаб чиқарилган бўлиб, янги авлод технологиялари билан жиҳозланган. Унинг дизайни ва инновацион технологиялари мусобақанинг тарихий аҳамиятини ўзида мужассам этган. Хусусан, унга «Trionda» номи берилиши ҳам рамзий маънога эга.

ФИФА президенти Жанни Инфантино буни қуйидагича изоҳлади:

«ФИФА Жаҳон Чемпионати-2026 учун расмий тўп – бу чинакам санъат асари! Мен «Trionda» тўпини тақдим этишдан хурсандман ва фахрланаман. «Adidas» яна бир бор рамзий ва технологик жиҳатдан мукаммал тўпни яратди – бу дизайн уч мезбон мамлакат – Канада, Мексика ва АҚШнинг бирдамлигини, иштиёқини ўзида ифода этади.

Бу гўзал тўпнинг дарвозани тўрига бориб тушишини интиқлик билан кутяпман. Футбол байрами тобора яқинлашмоқда – ва тўп энди ҳаракатда!»

«Trionda» номи испан тилидан таржима қилинганда «уч тўлқин» деган маънони англатади. Бу ном биринчи бор уч давлат – Канада, Мексика ва АҚШ – биргаликда мусобақага мезбонлик қилаётганини рамзий тарзда намойиш этади. Масан, ранглар уйғунлиги: Канада (қизил), Мексика (яшил) ва АҚШ (кўк) рангларидан илҳомланган. ФИФА Жаҳон чемпионати кубогига ишора сифатида олтин безаклар ишлатилган.

Тўпининг ўзига хос хусусиятлари:

Тўлқинли геометрик дизайн: Янги тўрт панелдан иборат шакл, тўлқин эффектларини акс эттирувчи чуқур чоклар орқали ҳаво ҳаракатида мукаммал барқарорликни таъминлайди.

Янги авлод технологиялари:

Ёпишқоқликни оширувчи юзаки иконлар, айниқса нам ҳавода ўйин учун қулайликни таъминлайди. Унга 500 гертс частотадаги ҳаракат датчиги ўрнатилган. Бу технология тўпнинг ҳаракатини аниқ қайд этиб, ВАР тизимига реал вақт режимида маълумот юборади, айниқса ноаниқ вазиятлар, жумладан офсайд ҳолатларини аниқлашда ёрдам беради.