Фото: Reuters

АҚШ президенти Дональд Трамп июнь ойи охирида Гаагадаги НАТО саммити чоғида Украина президенти Владимир Зеленский унга тақдим этган рўйхатдаги қуролларнинг бир қисмини Киевга беришга рози бўлган. Бу ҳақда “The Washington Post” газетаси америкалик расмийга таяниб хабар тарқатди.

Сешанба куни Трамп Украинага қўшимча қурол жўнатишга ваъда берди ва бу биринчи навбатда “мудофаа” қуролларига тегишли эканлигини таъкидлади. Кейинчалик Пентагон Украинага қўшимча мудофаа қуроллари юборилишини эълон қилди.

“Президент ҳозирда батафсил рўйхат асосида Украинадан сўралган ҳарбий ёрдам бўйича бир неча сўровларга рози бўлди”, — дея ёзди нашр Оқ уйнинг юқори мартабали мулозимига таяниб. Аниқлик киритилишича, бу рўйхатни Зеленский ўтган ой Гаагадаги учрашувда Трампга берган.

Газетанинг манбасига кўра, Зеленский 24-25 июнь кунлари Гаагада бўлиб ўтган НАТО саммитида Трампдан “жуда аниқ нарсаларни” сўраган ва Оқ уй раҳбари ҳозирда улардан баъзиларини беришга рози бўлган. Бироқ манба гап қандай қуроллар ҳақида кетаётганини ошкор қилишдан бош тортган.

Шу йилнинг 1 июль куни “Politico” нашри АҚШдан Украинага ўқ-дорилар ва қурол-яроғ етказиб бериш тўхтатилгани ҳақида маълум қилганди. Бироқ 7 июль куни Трамп Украинага қўшимча қурол жўнатишга ваъда берди ва бу биринчи навбатда “мудофаа” қуроллари эканини таъкидлади. АҚШ мудофаа вазирлиги матбуот котиби Шон Парнел ҳам президентнинг кўрсатмаси бўйича Украинага қўшимча “мудофаа қуроллари” жўнатилишини тасдиқлади.

Россия Украинага қурол етказиб бериш муаммони ҳал қилишга тўсқинлик қилади, НАТО давлатларини тўғридан-тўғри можарога жалб қилади ва буни “ўт билан ўйнаш”, деб ҳисоблайди.

Россия ташқи ишлар вазири Сергей Лавров Украина учун қурол-яроғ бўлган ҳар қандай юк Россия учун қонуний нишон бўлишини айтганди. Кремлга кўра, Ғарбнинг Украинага қурол-яроғ киритилиши музокараларга ҳисса қўшмайди ва салбий таъсир кўрсатади.

Шу йилнинг 7 июль куни АҚШ президенти Дональд Трамп Исроил бош вазири Бенямин Нетаньяҳу билан қўшма матбуот анжумани чоғида Россия президенти Владимир Путин билан 3 июль куни бўлиб ўтган телефон мулоқоти натижаларидан ҳафсаласи пир бўлганини айтди. Унинг сўзларига кўра, у ҳамкасбини Украинадаги можарони тўхтатишга ишонтиришга умид қилган, бироқ бу борада ҳеч қандай муваффақиятга эришиб бўлмаган.

Олдинроқ, “The Wall Street Journal” АҚШ президенти Дональд Трамп Украинага қўшимча “Patriot” ҳаво мудофаа тизимини юбориш имкониятини кўриб чиқаётгани ҳақида хабар берганди.