Архив фото

Украиндаги урушга тўлиқ 3 йил тўлар экан, АҚШ президенти Дональд Трамп можарони ҳал қилишда Россия президенти Владимир Путиннинг иттифоқчиси экани иддао қилинадиган Хитой раиси Си Цзиньпиннинг ёрдамидан умидвор.

«Умид қиламанки, Хитой Россия — Украина билан урушни тўхтатишга ёрдам беради. Улар бу вазиятда катта имкониятга эга ва улар билан бирга ишлаймиз», — деган эди Трамп ўтган ой Швейцарияда бўлиб ўтган Жаҳон иқтисодий форумида. Шу йилнинг январь ойида Трамп Цзиньпин билан қўнғироқлашганида ҳам юқоридаги умидини бир неча бор таъкидлаган.

Америка Қўшма Штатлари ой бошида Хитойдан АҚШга импорт қилинадиган маҳсулотларга 10 фоизлик бож жорий қилиб, вазиятни мураккаблаштирган бўлса-да, Украина муаммосини ҳал қилишда тил топиша олади.

Хитой ҳам узоқ вақтдан бери ўзини можарода потенциал тинчлик воситачиси сифатида кўрсатишга ҳаракат қилади, бироқ Ғарбнинг «Пекин Путин Россиясини қўллайди», деган қараши Европани ўйлантириб қўяди.

Сингапур Миллий университети доценти Чонг Жа Ианнинг айтишича, Пекин Россиянинг заифлашиб қолишидан қўрқади, чунки у асосий шеригидан маҳрум бўлиши мумкин. Унга кучсиз иттифоқчи керак эмас.

Масалалар бугун Германияда бошланадиган бўлажак Мюнхен Хавфсизлик конференцияси кун тартибида муҳокама қилинади. У ерда АҚШ вице-президенти Жей Ди Вэнс Украина президенти Владимир Зеленский билан учрашмоқчи. Хитой ташқи ишлар вазири Ван Йи ҳам Пекин делегациясига бошчилик қилади.

«CNN»нинг ўз манбаларига таяниб хабар беришича, АҚШ Мудофаа вазири Пит Хегсет, Давлат котиби Марко Рубио, АҚШ президентининг Украина ва Россия бўйича махсус вакили, генерал Кит Келлог Европада шу ҳафта бўлиб ўтадиган қатор учрашувларда Европа ва НАТОдаги ҳамкасбларини Украинани қўллаб-қувватлашда кўпроқ роль ўйнашга ундайди.

Шу ҳафта бошида «Fox News» телеканалига берган интервьюсида Трамп АҚШ ҳарбий ёрдам эвазига Украинанинг табиий ресурсларидан фойдаланиш ҳақида гапирди.

Трамп маъмурияти аъзолари яқин кунларда Украина расмийлари билан ҳам учрашмоқчи. Манбаларнинг «CNN»га хабар беришича, Ғазначилик котиби Скотт Бессант Киевга мамлакатдаги муҳим фойдали қазилма конларини муҳокама қилиш учун бориши кутилмоқда. Келлогг эса Мюнхендаги учрашувлардан сўнг мамлакатга ташриф буюради.

Зеленский АҚШ ва Европа Украинани қўллаб-қувватлашда давом этса, Путин билан музокаралар олиб боришга тайёрлигини айтмоқда.