20 январь куни Дональд Трамп АҚШнинг 47-президенти бўлиш йўлида АҚШ Конгресси Ротунда биносида қасамёд қилди. У мағлубиятга учраганидан кейин тўрт йил ўтиб Оқ уйга яна қайтди. Маросимга Байден билан бир қаторда Қўшма Штатларнинг собиқ президентлари Билль Клинтон, Жорж Буш ва Барак Обама ҳам ташриф буюрган.

Душанба куни президентликка қайтган Трамп ўзининг биринчи муддатидан кўра ўзини ишончлироқ тутиб, илк иш кунидан бир қанча ҳужжатларни имзолашини маълум қилган. У ўз нутқида Байден исмини тўғридан-тўғри айтмасдан, кетаётган маъмуриятни «коррупционер» деб атади.

«Бизнинг суверенитетимиз, хавфсизлигимиз қайта тикланади. Адолат тарозилари мувозанатланади. Адлия вазирлиги ва ҳукуматимизнинг шафқатсиз, зўравон ва адолатсиз қуролланиши тугайди», — деган Трамп.

Душанба кунги нутқида Пенсилвания штатининг Батлер шаҳрида сайловолди ташвиқоти пайтида қулоғидан «ўқ егани» ҳақида гапирар экан, ўтган саккиз йил давомида 250 йиллик тарихдаги барча президентлардан кўра кўпроқ синов ва қийинчиликлардан ўтганини қўшимча қилди.

Трамп жанубий чегаралардан хорижликларнинг кириб келишини тўхтатиш ҳақида гапирди. Унга кўра, миллионлаб чет элликларни келган жойларига қайтариш жараёни бошланади. Бу учун эса чегарага қўшин юборилади. Тахминларга кўра, мамлакатда 11 миллион киши ноқонуний яшаб келмоқда.

Ўзининг инаугурацияси арафасида Трамп АҚШ ҳудудини хорижда кенгайтириш ҳақида бир неча бор ишора қилган. У АҚШ қурган сув йўли бўйлаб адолатсиз савдо амалиётларини даъво қилиб, Панамадан Панама каналини қайтариб беришга чақирди.

Шунингдек, у Канадани АҚШнинг 51-штати бўлишга ундади. Бундан ташқари, Трамп Гренландияга бўлган ҳарислигини билдириб, Дания автоном ҳудудини ассимиляция қилишда ҳарбий ёки иқтисодий мажбурлашни истисно қилишдан бош тортди.

Трамп, шунингдек, Мексика кўрфазини «Америка кўрфази» деб ўзгартиришга чақирди ва у Аляскадаги Денали тоғ номини «Маккинли тоғи»га қайтаришини айтди.

Шунингдек, у қадр-қимматга асосланган жамият қуришга ваъда берди. «АҚШ ҳукуматининг расмий сиёсатида бундан буён фақат иккита жинс мавжуд: эркак ва аёл», — деган у.

«Биз раҳм-шафқат, жасорат ва истисноларга тўла халқ бўламиз. Бизнинг кучимиз барча урушларни тўхтатади ва ғазабланган, зўравон дунёга янги бирлик руҳини олиб келади», — дея чиқиш қилган Трамп.