АҚШнинг 47-президенти Дональд Трамп бугундан, 20 январдан, ўз лавозимига киришади. Оқ Уйга қайтган илк куниданоқ Трамп Байденнинг кўплаб фармонларини бекор қилиши ва юзга яқин қарор имзолаши кутилмоқда. Бу ҳақда «ABC News» нашри маълум қилган.

Хабарларга кўра, Трамп АҚШда ноқонуний яшаётган миллионлаб муҳожирларни тўплаш ва депортация қилишга қарор қилган.

«Биринчи куни жиноятчиларни чиқариб юбориш учун Америка тарихидаги энг йирик депортация дастурини ишга тушираман. Мен жиноятчилик авж олган шаҳарларни қутқараман, ёвуз ва қонхўр жиноятчиларни қамоққа ташлаймиз ҳамда уларни имкон қадар тезроқ юртимиздан қувиб чиқарамиз», — дейди у.

Шунингдек, Трамп президентликка келган биринчи кунидаёқ жанубий чегарани тўлиқ ёпишга ваъда берган. Бу ҳаракатларни амалга ошириш учун мамлакатда миллий фавқулодда ҳолат эълон қилиниб, АҚШ армиясидан ёрдам сўрашини маълум қилган.

Дональд Трампнинг сиёсат бўйича ўринбосари Стивен Миллер ҳам ушбу режаларни тасдиқлаган.

«Президент Трамп қасамёд қилган пайтда, ўзи айтганидек, ишғол тугайди ва озодлик куни бошланади. У зудлик билан чегарани ёпиб қўйиш тўғрисидаги буйруқларни имзолаб, Америкадаги энг йирик депортация операциясини бошлайди», — дейди Миллер.

Маълум бўлишича, АҚШда қонуний иммиграция мақомидаги 11 миллионга яқин рухсатномасиз муҳожирлар яшайди. Америка Иммиграция Кенгашининг ҳисоб-китобларига кўра, уларни олиб ташлаш йилига миллиардлаб долларга тушиши мумкин.

Эслатиб ўтамиз, Доналд Трамп 120 йил ичида аввалги ваколат муддати тугаганидан тўрт йил ўтиб яна ўз лавозимига киришган биринчи давлат раҳбари саналади.