Фото: AP

Дональд Трамп даврида энг узоқ вақт хизмат қилган Оқ уй аппарати раҳбари генерал Жон Келли собиқ президентнинг нацистлар етакчиси Адольф Гитлер ҳақида ижобий гапларига гувоҳ бўлганини айтди.

Келлига кўра, Трамп Гитлернинг яхши ишлар қилганини эътироф этган. Америка Қўшма Штатларида сайловлар якуний паллага кирар экан, вице-президент Камала Ҳарриснинг сайловолди кампанияси республикачи номзоднинг “фашист” экани ҳақида кўпроқ гапира бошлади. Унинг айтишича, бу Трампнинг ким эканлигини кўрсатувчи ойнадир. Шунингдек, Келли Трамп авторитар раҳбарларга қойил қолишини ва ҳукуматга диктатор ёндашувини афзал кўришини маълум қилган.

Собиқ денгиз пиёда генерали Келли 2017 йилда Трамп президентлигининг биринчи ойларида Оқ уй аппарати раҳбари бўлгунга қадар ички хавфсизлик бўйича котиб бўлиб ишлаган.

“The Atlantic” журнали эса икки номаълум манбага таяниб, Трамп Оқ уйда Гитлердек генералларга муҳтожлигини айтганини хабар қилди.

“Дональд Трамп тобора кучсиз ва беқарор бўлиб бормоқда. Демак, хулоса шуки, биз у нимани хоҳлашини биламиз. У назоратсиз кучни истайди. Бир неча кунлардан кейин эса Америка халқи нимани хоҳлашини билиб оламиз”, — деган Ҳаррис чоршанба куни Оқ уй олдида журналистларга.

Ижтимоий тармоқларда Ҳарриснинг кампанияси Келли ва “The Atlantic” томонидан билдирилган даъволарни кучайтирувчи бир нечта постларни эълон қилган. Трампнинг сайловолди ташвиқоти собиқ президентнинг бу гапларни айтганини инкор этди.

Келли Оқ уйда хизмат қилган вақтида Трампнинг энг зиддиятли сиёсатларини, жумладан, мусулмонлар кўп бўлган бир қанча мамлакатлардан саёҳатчиларни қабул қилишни тақиқловчи фармонни ҳимоя қилган. Келли бу тақиқ қонуний ва миллий хавфсизлик учун зарур эканлигини таъкидлаган.