Фото: Архив сурат

Тошкентда йўллардаги тирбандликни камайтириш мақсадида мактаб автобусларини йўлга қўйиш таклифи илгари сурилди. Бу масала 12 август куни бўлиб ўтган халқ депутатлари Тошкент шаҳри кенгашида муҳокама қилинган.

Сессия иштирокчиларидан бири 25 майдан кейин пойтахт кўчалари анча бўшаб қолишини, чунки ота-оналар фарзандларини таълим муассасаларига олиб боришдан тўхташи натижасида ҳаракат сезиларли даражада енгиллашишини қайд этган.

Унинг таъкидлашича, қатор хорижий давлатларда махсус тизим йўлга қўйилган бўлиб, унда мактаб автобуслари ёки шаттллар белгиланган ҳудуддан ўқувчиларни олиб кетади.

— Агар 20–30 бола битта автобусда келса, бу йўлларда 20–30 та шахсий автомобилнинг камайиши демакдир. Демографик ҳолат ва болалар сонидан келиб чиқиб, бу катта стратегик қадам бўлиши мумкин. Шу масалани Мактабгача ва мактаб таълими вазирлиги билан биргаликда муҳокама қилиш ва амалга ошириш керак, — деган сессия иштирокчиси.

ЙҲХБ бошлиғи ўринбосари Элмурод Алимовнинг айтишича, масала ўрганилган, аммо лойиҳа амалга ошириш жараёнида қатор қийинчиликларга дуч келади.

— Ҳозир Тошкент мактабларига фақат пойтахтдан эмас, балки Тошкент вилоятидан ҳам келадиганлар бор. Вилоятнинг 15 тумани бор, шу жойлардан ҳам болалар олиб келинади. Масалан, Юнусобод туманига қўшни туманлардан ўқувчилар келади. Ҳамма яхши мактабларга беришга интилгани учун бир ҳудуддан болаларни йиғиш қийин бўлади. Лекин таклифни яна ўрганамиз, — деган Алимов.