Тошкент шаҳрида ўзини Давлат хавфсизлик хизмати (ДХХ) ва Президент администрацияси ходими деб кўрсатиб, шахсий ишларини ҳал қилиш учун сохта гувоҳномалардан фойдаланган эркак суд ҳукмига тортилди. Бу ҳақда пойтахт ИИББ матбуот хизмати хабар берди.

Маълумотларга кўра, Шота Руставели кўчасида (Яккасарой тумани) ҳаракатланаётган «Lacetti» автомобили тўхтатилганда, унинг 32 ёшли ҳайдовчиси Д.О. ўзини ДХХ ходими сифатида таништирган. У инспекторларга гувоҳнома кўрсатиб, «юқори лавозимли раҳбарга қўнғироқ қилиш учун» ўзини қўйиб юборишни сўраган.

Ҳуқуқ-тартибот органлари фуқаронинг ҳаракатларини шубҳали деб топиб, текширув ўтказишди. Натижада унинг кўрсатган гувоҳномаси сохта экани ва Д.О.нинг ДХХга ҳеч қандай алоқаси йўқлиги аниқланди. У далилий ашёлар билан қўлга олинди.

Тергов давомида маълум бўлишича, Д.О. аввал ҳам судланган бўлган. У турли пайтларда ўзини Президент администрацияси ёки ҳуқуқни муҳофаза қилувчи органлар ходими сифатида таништириб, вазирлик ва идораларда ишлашини даъво қилган ва шахсий ишларини шу йўл билан ҳал қилган.

Суд ҳукмига кўра, Д.О. Жиноят кодексининг 228-моддаси 2 ва 3-қисми «а, б» бандларида назарда тутилган (ҳужжатлар, штамплар, муҳрлар, бланкларни тайёрлаш, сохталаштириш, сотиш ёки қонуний асоссиз фойдаланиш) жиноятларда айбли деб топилди ва 3 йил 6 ой муддатга озодликдан маҳрум этилиб, манзил-колонияга юборилди.