Иллюстратив фото

Токио Россиядаги ислоҳотларга ёрдам бериш учун ташкил қилинган барча — олтита япон марказини ёпишга қарор қилган. Бу ҳақда Япония Вазирлар Маҳкамаси бош котиби Ёсимаса Хаяси маълум қилди.

“Россия Федерацияси ва Россия — Япония муносабатларидаги вазиятнинг ўзгариши фонида бизнесни тугатиш тўғрисида қарор қабул қилинди”, — дейди у.

Шу йилнинг январь ойида Россия ҳукумати икки давлат ўртасида Россияда амалга оширилаётган ислоҳотларга техник ёрдам кўрсатиш бўйича Япония марказларини ташкил этиш ва фаолият юритиш бўйича меморандумларни қўллашни тўхтатиш тўғрисида фармойиш чиқарган эди. Бу ерда гап 2000 йил 5 сентябрда Токиода ва 2003 йил 29 июнда Владивостокда имзоланган ҳужжатлар ҳақида бормоқда.

“Япония маркази 1994 йилда Россиядаги ижтимоий-иқтисодий ислоҳотларни техник қўллаб-қувватлаш мақсадида ташкил этилган бўлиб, тегишли курслар, беш кунлик япон тили курслари, бизнес мослашув ва бошқа тадбирлар орқали Япония — Россия муносабатларини чуқурлаштиришга ҳисса қўшди”, — дейди Хаяси.

Бош котибнинг сўзларига кўра, Япония маркази ўзининг тарихий вазифасини тўлиқ бажарган ва уларнинг ёпилиши ҳақида дипломатик каналлар орқали Москва расман хабардор қилинган.

“Таъкидлаш жоизки, жорий йилнинг январь ойида Россия ҳукуматининг тегишли меморандумни қўллашни тўхтатиш тўғрисидаги бир томонлама қарори ҳам ёпиш тўғрисида қарор қабул қилишда муҳим омил бўлди. Ушбу қарор билан боғлиқ ҳолда, шунингдек, Россия томонидан кейинчалик конструктив ҳамкорлик йўқлиги сабабли, биз Россия томонига ёпилиш тўғрисида хабар беришда яна бир бор афсус билдирдик”, — дея қўшимча қилди Хаяси.

“Хоккайдо Шинбун” газетаси журналисти ҳам Бош котибдан август ойида Владивостокдаги Япония марказида ўтказилган текширувлар ҳақида сўради.

“Шу йилнинг 30 июль ва 26 август кунлари Россия Ички ишлар вазирлиги ходимлари Владивостокдаги Япония марказига ташриф буюриб, текширувлар, жумладан, ходимлар билан суҳбат ўтказганидан хабардормиз. Ҳукумат Россия томонини марказ ходимларининг жисмоний хавфсизлигини таъминлашга чақиради ва вазиятга жавоб бериш учун зарур чораларни кўрмоқда”, — дея жавоб берди Хаяси.

Япония Украинадаги вазият туфайли Россияга қарши бир нечта санкциялар пакетини қабул қилди. Бунга жавобан 2022 йил 21 март куни Москва Токио билан тинчлик шартномасини тузишдан бош тортди. Япония фуқароларининг жанубий Курил оролларига визасиз саёҳати тугатилди ва бу ҳудудда қўшма иқтисодий фаолиятни йўлга қўйиш бўйича мулоқотдан чиқишини эълон қилди.

Россия президенти Владимир Путин аввалроқ шарқий қўшни билан яқин 5 ва 50 йил давомида муносабатларни ўрнатишга тайёрлигини билдирган ва Токиони хулоса чиқариб, қайтишга чақирган эди. Шу билан бирга, унинг сўзларига кўра, Японияда ҳамон Россия билан ҳамкорликни, айниқса, энергетика соҳасида давом эттиришни истовчи ақлли одамлар бор.