Illyustrativ foto

Tokio Rossiyadagi islohotlarga yordam berish uchun tashkil qilingan barcha — oltita yapon markazini yopishga qaror qilgan. Bu haqda Yaponiya Vazirlar Mahkamasi bosh kotibi Yosimasa Xayasi maʼlum qildi.

“Rossiya Federatsiyasi va Rossiya — Yaponiya munosabatlaridagi vaziyatning oʻzgarishi fonida biznesni tugatish toʻgʻrisida qaror qabul qilindi”, — deydi u.

Shu yilning yanvar oyida Rossiya hukumati ikki davlat oʻrtasida Rossiyada amalga oshirilayotgan islohotlarga texnik yordam koʻrsatish boʻyicha Yaponiya markazlarini tashkil etish va faoliyat yuritish boʻyicha memorandumlarni qoʻllashni toʻxtatish toʻgʻrisida farmoyish chiqargan edi. Bu yerda gap 2000-yil 5-sentyabrda Tokioda va 2003-yil 29-iyunda Vladivostokda imzolangan hujjatlar haqida bormoqda.

“Yaponiya markazi 1994-yilda Rossiyadagi ijtimoiy-iqtisodiy islohotlarni texnik qoʻllab-quvvatlash maqsadida tashkil etilgan boʻlib, tegishli kurslar, besh kunlik yapon tili kurslari, biznes moslashuv va boshqa tadbirlar orqali Yaponiya — Rossiya munosabatlarini chuqurlashtirishga hissa qoʻshdi”, — deydi Xayasi.

Bosh kotibning soʻzlariga koʻra, Yaponiya markazi oʻzining tarixiy vazifasini toʻliq bajargan va ularning yopilishi haqida diplomatik kanallar orqali Moskva rasman xabardor qilingan.

“Taʼkidlash joizki, joriy yilning yanvar oyida Rossiya hukumatining tegishli memorandumni qoʻllashni toʻxtatish toʻgʻrisidagi bir tomonlama qarori ham yopish toʻgʻrisida qaror qabul qilishda muhim omil boʻldi. Ushbu qaror bilan bogʻliq holda, shuningdek, Rossiya tomonidan keyinchalik konstruktiv hamkorlik yoʻqligi sababli, biz Rossiya tomoniga yopilish toʻgʻrisida xabar berishda yana bir bor afsus bildirdik”, — deya qoʻshimcha qildi Xayasi.

“Xokkaydo Shinbun” gazetasi jurnalisti ham Bosh kotibdan avgust oyida Vladivostokdagi Yaponiya markazida oʻtkazilgan tekshiruvlar haqida soʻradi.

“Shu yilning 30-iyul va 26-avgust kunlari Rossiya Ichki ishlar vazirligi xodimlari Vladivostokdagi Yaponiya markaziga tashrif buyurib, tekshiruvlar, jumladan, xodimlar bilan suhbat oʻtkazganidan xabardormiz. Hukumat Rossiya tomonini markaz xodimlarining jismoniy xavfsizligini taʼminlashga chaqiradi va vaziyatga javob berish uchun zarur choralarni koʻrmoqda”, — deya javob berdi Xayasi.

Yaponiya Ukrainadagi vaziyat tufayli Rossiyaga qarshi bir nechta sanksiyalar paketini qabul qildi. Bunga javoban 2022-yil 21-mart kuni Moskva Tokio bilan tinchlik shartnomasini tuzishdan bosh tortdi. Yaponiya fuqarolarining janubiy Kuril orollariga vizasiz sayohati tugatildi va bu hududda qoʻshma iqtisodiy faoliyatni yoʻlga qoʻyish boʻyicha muloqotdan chiqishini eʼlon qildi.

Rossiya prezidenti Vladimir Putin avvalroq sharqiy qoʻshni bilan yaqin 5 va 50-yil davomida munosabatlarni oʻrnatishga tayyorligini bildirgan va Tokioni xulosa chiqarib, qaytishga chaqirgan edi. Shu bilan birga, uning soʻzlariga koʻra, Yaponiyada hamon Rossiya bilan hamkorlikni, ayniqsa, energetika sohasida davom ettirishni istovchi aqlli odamlar bor.