Фото: Акмал Муҳаммадов / “Халқ сўзи”

Президентимиз ташаббуси билан 2024 йил 1 январдан бошлаб чоп этилаётган «Жадид» газетаси ўтган қисқа даврда ўз ўқувчиларини топишга улгурди. Бу бежиз эмас, албатта. Мазкур нашр жонажон Ватанимизни севган, унинг тараққиёти ва порлоқ келажаги учун ўзини дахлдор сезган ҳар бир юртдошимиз, маърифатпарвар аждодларимизга муносиб издош бўлишга интилаётган жасоратли зиёлиларимиз учун минбарга айланиб бормоқда.

Газета саҳифаларида жадидларнинг миллатни ислоҳ этишга оид ғоялари, асарларидан намуналар, шунингдек, «Давр руҳи», «Ойина», «Жамият», «Замон жадидлари», «Таклиф», «Мулоҳаза», «Тамаддун», «Боқий мерос», «Фикр майдони» каби рукнлар остида таниқли сиёсатчилар, социологлар, адабиётшунослар, ёзувчи ва шоирлар, публицистлар, олимлар, тарихчиларнинг илмий-оммабоп мақолалари бериб борилмоқда.

Албатта, ҳар бир нашрнинг ўз ривожланиш йўли, мамлакатимиз равнақида ўз ўрни бор. «Жадид» газетаси эса матбуотни «бутун дунёдаги маданий миллатларнинг ҳаёт йўллари, оламдаги даражалари ҳамда инсоният тараққийсининг энг юқори поғонасига эришмоқ учун лозим бўлган саъй-ҳаракатлари тўғрисида бир-бирлари билан маслаҳат ва кенгаш қилмоқ учун бағоят зарур бир восита», деб билган жадид боболаримизнинг эзгу анъаналарини давом эттиришга интилаётган нашр сифатида медиа майдонида юз кўрсатди.

Мамлакатимиз тараққиётининг янги даврида ҳуқуқий демократик давлат ва фуқаролик жамияти қуриш йўлида чуқур ислоҳотлар амалга оширилар экан, матбуот ва сўз эркинлигини таъминлашга жиддий эътибор берилмоқда. Оммавий ахборот воситалари оммага юртимиздаги тарихий янгиланишларни рўйирост кўрсатадиган, турли соҳаларда мавжуд камчилик ва муаммоларни холисона таҳлил қилиб, уларнинг ечимларини берадиган фикр ва қарашлар, талқинлар кураши майдонига, жамият юзига тутилган кўзгуга айланиб бормоқда.

«Жадид» газетаси ана шу қизғин жараёнда халқимиз ойдинларининг мустабид тузум замонида илгари сурган ғоялари, истиқбол режаларига урғу қаратиб қолмай, юртимизда рўй бераётган бугунги ўзгаришларнинг маъно-моҳияти ҳамда аҳамиятини ўзига хос усул ва услубда ёритишга ҳаракат қиляпти.

«Тилда, фикрда, ишда бирлик!» китобида таҳририят жамоасининг бир йиллик фаолияти сарҳисоби ўлароқ нашр саҳифаларидан жой олган энг сара мақолалар, табриклар, дил сўзлари, жозиб шеърлар, кичик тадқиқотлар, таҳлиллар, таққослар, талқинлар жамланди. Шу маънода, тўпламга киритилган материалларни газетада чоп этилган ижодий ишларнинг қаймоғи, дейиш мумкин.

Китоб ўзига хос кўркам дизайн ва кўринишга эга бўлиб, тезда ўқувчилар эътиборини тортади. Миллий анъаналарга ҳамоҳанг безаклар, рангли фотосуратлар унинг сийратини янада бойитган.

Тўпламнинг илк саҳифаларидан давлатимиз раҳбарининг «Жадид» газетаси жамоаси ва муштарийларига йўллаган табриги жой олгани унинг аҳамияти ҳамда нуфузини янада оширган.

ХХ аср бошларида халқимизни озодлик учун курашга чорлаган, Ватан истиқболи йўлида жон фидо қилган боболаримиз ҳаёти ҳамда фаолиятини чуқур ўрганиш, кенг тарғиб этиш давлат сиёсати даражасига кўтарилган янги Ўзбекистонда «Жадид» газетаси чоп қилиниши, шунингдек, таҳририят жамоаси меҳнатлари маҳсули ўлароқ дунё юзини кўрган «Тилда, фикрда, ишда бирлик!» китоби ҳозирги таҳликали, онгу қалбга қаратилган ахборот хуружлари авж олган замонда бебаҳо қиймат касб этади. Ушбу лойиҳалар халқимизни маънавий уйғоқликка чорлаш, ватанпарвар, миллатсевар авлодни камолга етказишга катта ҳисса қўшади.

Зеро, Президентимиз таъбири билан айтганда, мамлакатимиз ўз тараққиётининг янги, юксак босқичига кираётган ҳозирги пайтда бизга жадид боболаримиз каби Ғарб илм-фани ютуқлари билан бирга, миллий қадриятлар руҳида тарбия топган етук кадрлар сув билан ҳаводек зарур.

Шу йилнинг 19 февраль куни «Жадид» газетасида чоп этилган сара мақолалар асосида тайёрланган «Тилда, фикрда, ишда бирлик» китобининг тақдимоти бўлиб ўтди. Тадбирда дипломатик корпус вакиллари, жадидшунос олимлар, атоқли адиб ва публицистлар, санъат вакиллари ҳамда жамоатчилик иштирок этди.

Тадбир доирасида жадидлар ҳаёти ва фаолиятига бағишланган китоблар, тасвирий санъат асарлари кўргазмаси намойиш этилди. Шунингдек, Ўзбекистон давлат драма театри репертуаридаги «Туркистон болалари» спектаклидан парча йиғилганларга тақдим қилинди.

Тадбир якунида «Жадид» газетаси томонидан ўтказилган «Муштарийлар эътирофи» танлови ғолиблари тақдирланди.