Фото: "Халқ сўзи"

Фарҳод Эсонов/“Халқ сўзи”. Бугун Термиз шаҳрида Сурхондарё тажрибаси мисолида “Талабалар баҳори” ёшлар фестивали бошланди.

Фестивал дастуридан бир қатор тадбирлар ва мусобақалар ўрин олган. Жумладан, талабалар ўртасида “Ҳашар — биз ёшларга ярашар” шиори остида “Ҳар бир ёшга бир ниҳол” лойиҳаси, “Музейлар — ёшлар нигоҳида” тадбири, “Қувноқлар ва зукколар” танлови, “Заковат” интеллектуал ўйини, “Бахшичилик”, “Чанқовуз” ва “Сибизға” ижрочилиги бўйича беллашувлар, оммавий югуриш марафони, “Соғлом ҳаёт учун 5000 қадам” юриш марафони, веломарафон, мини-футбол, кураш, камондан ўқ отиш, бадиий гимнастика, волейбол, стол тенниси, шахмат, армрестлинг, тош кўтариш, арқон тортиш каби спорт мусобақалари, “Экологик лойиҳаларни амалга оширилишида чет эл тажрибаси” мавзусида хорижда ўқиётган ёшлар билан Zoom платформаси орқали мулоқот, “Ижодимда Ватан тимсоли” ёш рассомлар ва тасвирий санъат асарлари кўргазма-танлови ва пазандачилик баҳслари ўтказилиши режалаштирилган.

Фестивал танловлари ғолиблари ва фаол иштирокчилари пул ва қимматбаҳо совғалар билан тақдирланади. Бундан ташқари, таниқли санъаткорлар иштирокида гала концерт, мушакбозлик ва лазер шоу ташкил этилиши кўзда тутилган.