Бандихон тумани “Чашма” фермер хўжалигидаги пахта майдонларида биринчилардан терим жадал суръатда бошланди.

Сурхондарё вилоятида йиғим-теримга пухта тайёргарлик кўрилган. Далаларда техникалар шай ҳолатга келтирилган, теримчилар отрядлари учун барча зарур шарт-шароитлар яратилган. Озиқ-овқат, ёқилғи-мойлаш маҳсулотлари, махсус воситалар захираси шакллантирилиб, мавсумни сифатли ва қисқа муддатда якунига етказишга катта эътибор қаратилган.

Дарвоқе, анъанага кўра, пахта йиғим-терим мавсуми арафасида Ал-Ҳаким ат-Термизий мажмуасида эҳсон тадбири ташкил этилган эди. Унда давлат ва жамоат ташкилотлари раҳбарлари, туман ҳокимлари, қишлоқ хўжалиги фахрийлари ва жамоатчилик вакиллари иштирок этди.

Жорий мавсумда пахта теримида Хитойда ишлаб чиқарилган замонавий FM WORLD 4MZ-4 русумли пахта териш машиналари вилоят далаларида биринчи бор синовдан ўтказилади. Бу техника ҳосилни тез ва сифатли йиғишда фойдаланиш учун кластер ва фермер хўжаликлари томонидан жами 60 дона миқдорида харид қилинган. Замонавий машина пахтакорлар меҳнатини енгиллаштиришга хизмат қилади.

Бу йил Сурхондарё вилояти пахтакорлари 62 минг 852 гектар майдонда ғўза парваришлади, биринчи бўлиб пахта топшириш режасини бажаришни мақсад қилишган.

Фарҳод ЭСОНОВ

«Халқ сўзи».