2025 йилги мавсумда Ўзбекистон клублари умумий ҳисобда 24 мамлакатдан 85 нафар легионер футболчини Суперлига лига рўйхатидан ўтказди. Мазкур клублар томонидан танланган легионерларнинг 13 нафари сербиялик футболчилар бўлди. Бу ушбу мавсумдаги энг юқори натижа сифатида қайд этилди.

Шунингдек, Бразилия ва Грузия давлатларидан 8 тадан, Черногория мамлакатидан 7 нафар, Россиядан 6 нафар, Тожикистон, Украина ва Нигериядан 5 тадан ҳамда Хорватиядан 4 нафар легионер футболчи жалб этилди. Яна бир эътиборга молик ҳолат сифатида айтиш мумкинки, бу мавсум Ўзбекистон Суперлигасида биринчи маротаба Колумбия фуқаролигига эга футболчи майдонга тушди.

«Transfermarkt» портали маълумотига кўра, 2025 йил Ўзбекистон Суперлигасида ўйнаган энг қиммат футболчи сифатида «Сўғдиёна» клубининг шимолий македониялик ҳужумчиси Люпчо Дориев қайд этилди. Ушбу футболчига портал томонидан 1 миллион 200 минг евро нарх қўйилганди. Дориев бундай нархга лойиқ футболчи эканини мавсум давомида кўрсата олди. Йил якунида Профессионал футбол лигаси томонидан Люпчони «Йилнинг энг яхши легионер футболчиси» деб топилиши юқоридаги фикрга далил бўла олади.

Шунингдек, «Transfermarkt»га кўра, қиммат футболчилар ҳақида гап борса, «Пахтакор»нинг ироқлик футболчиси Башар Ресан (800 минг евро), «Нефтчи»нинг черногориялик ҳужумчиси Владимир Йовович ҳамда Фарғона клубининг асли африкалик бўлган, аммо Қирғиз Республикаси фуқаролигига эга футболчиси Жоэл Кожоларни эслаб ўтишимиз мумкин.

Легионерларга алоҳида тўхталишдан олдин, уларга клублар кесимида баҳо берсак. «Андижон» ва «Насаф» клублари бу мавсумда хорижлик футболчилар танлови бўйича яхши кўрсаткич қайд эта олишмади.

Андижонда бунга маълум даражада клубда мураббийлар алмашиб кетгани ҳам сабаб бўлди. Александр Хомяков даврида клубга жалб этилган Миомир Юричкович, Мирзад Меҳанович каби болқонлик футболчилар Максим Шацких бош мураббийликка келганидан кейин жамоадан кетказилди. Ислом Машуковнинг трансфери омадсиз чиққанини эса Хомяков жамоани бошқарган даврдайоқ маълум бўлиб қолганди. Аммо улар ўрнига Шацких томонидан жамоага олиб келинган Кристиан Новак ва Исмоил Акинаделарни ҳам омадли трансфер деб айтиб бўлмасди.

Солиштириш учун, 2025-йилги мавсум бошида «Андижон» жамоага кераксиз деб билиниб, «Хоразм» клубига ижарага берилган тожикистонлик ҳужумчи Шаҳром Самиев мавсум давомида 6 та гол киритди. «Андижон» жамоага катта мақсадлар билан олиб келинган Ислом Машуков ва Исмоил Акинаде эса бу мавсум Суперлигада умумий ҳисобда 2 та гол киритишди.

Фақатгина Эржан Токотаевни муваффақиятлироқ трансфер деб баҳолаш мумкин эди. Аммо у ҳам кўп вазиятларда жамоасини қутқара олмади.

Қаршининг «Насаф» клуби ҳам мавсум учун легионерлар танлашда омадсизликка дуч келди. Фақатгина Драган Черан масаласида омадсизлик деган фикр айта олмаймиз. Ҳар қалай бир мавсумда 8 та гол киритиш 38 ёшли футболчи учун ёмон натижа эмас.

Лекин Неъматовга умуман рақобат тақдим эта олмаган украиналик дарвозабон Александр Воробей, Нигерия терма жамоасида ўйнагани кўп пиар қилинган, аммо амалда Суперлига доирасидаги бирорта учрашувда майдонга тушмаган Кингсли Сокари, шунингдек Юсуф Отубанжо ва Аденис Шала каби номлар клубни кучайтира олмадилар.

Легионерлар масаласида омадли юришни амалга оширган клублар қаторида «Пахтакор», «Бухоро», «Бунёдкор» жамоаларини эътироф этишимиз мумкин.

«Пахтакор»га қўшилган ироқлик Башар Ресан ва Зайд Таҳсин клуб ўйинига яхши томондан таъсир ўтказа олдилар. Фламарион ва Брайан Риаскослар жамоа ўйинини бузиб қўйишмади. Тўғри, йил бошида элита Чемпионлар лигасида бўлиб ўтган баҳслардан сўнг улардан янада кўпроқ натижа кутилганди. Бироқ, барибир Ўзбекистон савиясида яхши ўйин намойиш эта олишди.

«Бухоро» клуби ҳам легионерлар масаласида яхши танловларни амалга оширди. Ҳимояга жавоб берувчи легионер футболчилар Марко Колакович, Фране Икич, Франье Чиряк ва Йосип Томашевичларнинг ҳар бири бу мавсумда 25 тадан ортиқ ўйинда майдонга тушдилар.

Мавсум бошида жамоага қўшилган Доминик Бегич Суперлигада 7 та гол урди. Иккинчи давра бошида «Нефтчи»дан кўчиб ўтган Тома Табатадзе эса «Бухоро» учун лигада 4 та гол уриб берди.

Шунингдек, «Бухоро» клубининг Ўзбекистон кубоги финалига чиқишида ҳам Фране Икич, Тома Табатадзе, Доминик Бегич каби футболчиларнинг муҳим ўйинлардаги қатор голлари сабаб бўлди.

«Бунёдкор» ҳам сифатли легионерлар масаласида бемалол мақтана олади. Ўтган йили клубга келган ва биринчи даврада 8 та гол киритган Луис Качоррини халқаро мусобақада ўйнайдиган жамоа олиб кетгани ҳам бу легионер масаласида яхши танлов қилинганини англатади. Шунингдек, Марко Бугарин, Имеда Ашортия, Николаз Мали, Итсуки Урата каби легионерлар ҳам жамоа ўйинида муҳим аҳамият касб этишди.

Ўз навбатида мусобақада ажойиб ўйин кўрсатиб, мухлислар кўнглидан жой олган легионер футболчилар ҳам талайгина. Люпчо Дориев, Имеда Ашортия, Владимир Бубаня, Дмитрий Плетнёв, Башар Ресан, Ратиньо ва Зоран Марушич шулар жумласидан.

«Sofascore» таҳлилий портали версиясига кўра, «Сўғдиёна» футболчиси Люпчо Дориев бу мавсум нафақат легионерлар орасида, балки маҳаллий футболчилар ҳам қўшиб ҳисобланганда ҳам лиганинг энг яхши футболчиси бўлди.

Ўтган йили «Sofascore» маълумотига кўра, Владимир Йовович Суперлиганинг энг яхши футболчиси деб топилганди. Бу йил эса «Сўғдиёна»нинг бошқа аъзоси бу номга лойиқ кўрилди. «Сўғдиёна» клубининг легионерлар танлови бўйича ишлари жойида. Ҳар қалай кетма-кет 2 мавсум ушбу жамоанинг хорижлик футболчилари Ўзбекистон Суперлигасининг энг яхши футболчиси деб топилаётгани кўп нарсадан дарак беради.

Сўнгги сўз ўрнида таъкидлаш керакки, Ўзбекистон Суперлигасида легионер футболчиларнинг умумий савияси ошди. Ҳар қалай ҳолат 4–5 йил олдингидек эмас. Лекин бу мақтов эмас. Клубларимиз легионерлар масаласида янада сифатлироқ танловларни амалга оширишлари мумкин. 2026-йилда Суперлига клубларидан мана шундай ёрқин трансферларни кутиб қоламиз.