Сирдарё вилояти ҳокими Эркинжон Турдимов Япониядан ташриф буюрган тадбиркорлар делегациясини қабул қилди. Бу ҳақда Сирдарё вилояти ҳокимлиги ахборот хизмати маълум қилди.

Япония делегацияси таркибида қурилиш, логистика, саноат, автомобилсозлик ҳамда хизмат кўрсатиш соҳаларида фаолият юритаётган йирик компания ва корпорациялар раҳбарлари иштирок этди. Хусусан, учрашувда Kodaira Kogyo қурилиш компанияси президенти, Kojima Logistics логистика компанияси бош директори, TDG Holdings ҳамда Kumamoto KDC Group компаниялар гуруҳи раҳбарлари қатнашди. Шунингдек, делегация таркибида Hirozawa Driving School автомобиль тайёрлаш маркази, Onnetsu, Minami Holding, Asari Construction компаниялари ҳамда Fairness Japan хусусий бандлик агентлиги вакиллари ҳам бўлди.

Япония Республикасидаги Ўзбекистон элчихонаси ташаббуси билан ташкил этилган мазкур учрашувда ўзаро ҳамкорликни янада ривожлантириш, қўшма лойиҳаларни амалга ошириш, инвестиция жалб этиш, замонавий технологиялар ва илғор тажрибаларни жорий этиш масалалари атрофлича муҳокама қилинди.

Учрашув давомида Сирдарё вилоятининг инвестиция салоҳияти, саноат ва қишлоқ хўжалиги соҳаларидаги имкониятлари, шунингдек, инфратузилма ва логистика йўналишларида амалга оширилаётган ислоҳотлар тўғрисида батафсил маълумот берилди. Япониялик тадбиркорлар эса ўз навбатида Сирдарё вилояти билан ҳамкорлик қилишга қизиқиш билдириб, келгусида аниқ инвестиция лойиҳаларини ишлаб чиқишга тайёр эканликларини таъкидладилар.

Айтиш жоизки, мазкур учрашув жорий йил январь ойида Сирдарё вилояти делегациясининг Японияга амалга оширган ташрифи доирасида ўтказилган музокараларнинг мантиқий давоми бўлиб, икки томонлама иқтисодий ҳамкорликни янада мустаҳкамлашга хизмат қилади.

Аҳмадали ШЕРНАЗАРОВ, «Халқ сўзи».