Фото: Tashkent City

Бугунги кунда Тошкент шаҳрида жуда катта қурилиш ишлари амалга оширилмоқда. Мисол тариқасида хусусий корхоналар томонидан жуда кўплаб янги уйлар қурилаётганини олишимиз мумкин. Урбанизация жараёнида бу ҳолатни табиий қабул қилиш мумкин. Аммо уларнинг барчаси шаҳар учун тақсимланган энергия манбаидан, шаҳар коммуникация тармоқларига (канализация ва бошқалар) уланяпти. Бу албатта энергетика манбаларига, коммуникация тармоқларига қўшимча юклама келтириб. Чиқаради. Лекин шу пайтгача ўша уй қураётган ташкилотлар қандайдир энергетика таъминоти объектлар, ёки янги коммуникация тармоқлари қураётгани или шунга пул ажратаётгани ҳақида хабар йўқ. Бу қанчалик тўғри? Келгусида бундай қўшимча юкламалар сабаб Тошкентда ҳам бу бу соҳаларда муаммолар пайдо бўлиши мумкинми?

Ахборот ва оммавий коммуникациялар агентлигида ташкил этилган матбуот анжуманида қатнашган Иқтисодиёт ва саноат вазирлиги ҳузуридаги Прогнозлаштириш ва макроиқтисодий тадқиқотлар институти директори ўринбосари Турсун Аҳмедовга шу савол билан мурожаат қилдик.

“Ҳар бир янги лойиҳа амалга оширилаётганда, лойиҳани асослашда ҳудуднинг сув қуввати, электр-энергия қуввати, канализация қуввати ва бошқа коммуникация тармоқларининг имкониятлари қурилиш бошланишидан олдин эътиборга олиниб кейин иш бошланиши керак. Агар юқорида санаб ўтилган барча жиҳатларда қувват етмайдиган бўлса, бу шаҳар бўйича кўриб чиқилиши керак. Фақат Toshkent City миқёсида эмас, бутун шаҳар миқёсида. Агар битта Cityʼга сув етсада, иккинчи Cityʼга келганда муаммо туғилса, бу бўлмайди.

Бунинг учун шаҳарнинг ўзида инфратузилмаларни ривожланиш учун махсус схемаси бўлиши керак. Унда Бугун ёки 2020 йилда эмас, 2030-2040 йилларда Тошкентда ичимлик суви таъминоти қандай бўлади, деган саволга жавоб бўлиши керак. Схемада, агар етмайдиган бўлса, қўшимча сув чиқарувчи станциялар, сувни филтрлайдиган қурилмалар қурилиши бўйича лойиҳалар бўлиши керак. Агар Тошкентда қурилаётган ҳар бир объект бу лойиҳага тушмайдиган бўлса, унда янги канализация тармоғи, ичимлик сувини, электр-энергияни қаердан олади? Шаҳарнинг умумий манбаига ортиқча юклама тушади албатта.

Мен бугунги кундаги қурилаётган лойиҳалар билан тўлиқ танишмаганман, шунинг учун уларнинг бу борада режалари ҳақида жавоб бера олмайман, лекин қайтариб айтишим мумкин. Қурилаётган ҳар бир объект, ҳар бир лойиҳа учун унинг келажакдаги таъминоти учун чизмаси бўлиши керак. Ёки шаҳар ҳокимлиги 10-20 йилдан кейин ҳам лойиҳа бўйича кафолат бериши керак, масалан: бирор лойиҳа қурилаётган ерда 10 йилдан кейин ҳам барча коммуникация тармоқлари электр-энергия билан таъминланади”, дея гапириб ўтди Аҳмедов “Халқ сўзи“ мухбири билан суҳбатда.