Буюк Британияга амалий ташрифи доирасида Олий Мажлис Сенати Раиси Танзила Норбоева ушбу мамлакатда истиқомат қилаётган, етакчи олий таълим муассасаларида таҳсил олаётган ва дунёнинг етакчи компанияларида фаолият юритаётган бир гуруҳ ватандошларимиз билан учрашди.

Очиқ ва жонли тарзда ўтган мулоқотда Янги Ўзбекистон тараққиёт стратегиясида мамлакатни ривожлантириш мақсадида белгиланган вазифалар, айни пайтда турли соҳаларда амалга оширилаётган ислоҳотлар ва уларнинг мақсадлари ҳақида фикр юритилди.

Суҳбат чоғида иштирокчилар ўзларининг эришган ютуқлари ва режалари, жумладан, ЕТТБнинг мамлакатимизга оид дастури фаолиятини кенгайтириш ҳамда Ўзбекистон билан ҳамкорликни мустаҳкамлашга хизмат қилаётган бошқа лойиҳалар билан ўртоқлашдилар.

Дўстона ва самимий кечган учрашув чоғида икки давлат ўртасидаги муносабатларни мустаҳкамлашга қаратилган ислоҳотлар ва тадбирлар ҳақидаги янгиликлар муҳокама қилинди.

Шунингдек, ватандошлар Буюк Британияда иккинчи марта ўтказилиши режалаштирилган миллий Наврўз фестивали ҳақида ҳам сўз юритдилар. Ўтган йили фестиваль 25 000 дан ортиқ иштирокчини қамраб олган. Ўзбек маданияти ва анъаналарига бағишланган бу йилги иккинчи фестиваль ҳам барчани яна бир бор ўз атрофида бирлаштириши айтиб ўтилди.

Учрашув жараёнида мамлакатимиз ҳаётининг турли соҳалари бўйича фикр алмашилди ҳамда тараққиётга туртки бўладиган таклифлар билдирилди. Ватандошларимиз юртимиз ривожига муносиб ҳисса қўшишга тайёр эканликларини таъкидладилар.