Иккинчи ўрта вазн тоифасида WBC, WBA ва WBO чемпиони Саул Алварес америкалик WBA чемпиони Теренс Кроуфордни танқид қилди. Алвареснинг сўзларига кўра, Кроуфорднинг фаолиятида фақатгина битта йирик ғалаба бор ва у асосан кучсиз рақиблар билан рингга чиққан. «Мен Теренс Кроуфордни ҳурмат қиламан. Аммо у бор-йўғи битта катта жангда ғолиб бўлган. Спенсдан ташқари яна кимдир бор деб ўйламайман», — деди Алварес.

Гап шундаки, Алвареснинг танқиди ортидан халқаро бокс ишқибозлари Исроил Мадримов номини тилга олиб, Теренсни Спенсдан кўра ўзбек боксчиси қийин аҳволга солиб қўйганини айтишмоқда. Қайд этиш керакки, Кроуфорд 2023 йил июль ойида Эррол Спенсни 9-раундда техник нокаут билан мағлуб этган бўлса-да, Мадримовга қарши жангда у жиддий қийинчиликларга дуч келганди. Ушбу жанг 12 раунд давом этган бўлиб, ҳисоб Кроуфорд фойдасига ҳал қилинган. Шунга қарамай, кўплаб мутахассислар Мадримовнинг ишончли ҳаракатлари ва юқори даражадаги ҳунарини алоҳида қайд этишган.

Саул Алвареснинг танқидларига Теренс Кроуфорд жавоб қайтариб, ўз рақибларини «ҳимоя» қилди. «Қандай бедодлик. Менинг барча рақибларим ёмон боксчиларми? Мен уларни рингда кучсиз кўринишга мажбур қиламан», — деб ёзди Кроуфорд.

Мутахассислар Кроуфорднинг Мадримовга қарши ишончсиз ҳаракатларини турлича изоҳлашди. Собиқ жаҳон чемпиони Пол Малиньяжи фикрига кўра, Мадримовнинг тажрибаси Кроуфорд учун катта қийинчилик туғдирган. Майк Тайсон эса Мадримовни «жуда ноқулай ва кучли рақиб» деб таърифлаб, унинг ҳаракатларини юқори баҳолаган. Тайсонга кўра, Кроуфорд Мадримовнинг ноанъанавий услубига ўрганмаган.

Саул Алварес ва Теренс Кроуфорд ўртасидаги жанг ҳақида турли нашрлар хабар тарқатмоқда. Айтилишича, томонлар жанг бўйича келишувга эришган ва у шу йилнинг сентябрь ойида ўтказилиши мумкин. Агар ушбу жанг амалга ошса, бу боксчилар учун янада катта синов бўлади.

Саул Алвареснинг Кроуфордга нисбатан танқид қилиш фонида Исроилни унутиб қўйган ёки унинг ўлчови бошқа мезонларга бориб тақалади.

Кроуфорд ва Алварес ўртасидаги эҳтимолий жанг, шубҳасиз, кенг жамоатчилик орасида катта қизиқиш уйғотяпти.

«Канело» лақабини олган мексикалик Саул Алварес профессионал боксда 63 та жанг ўтказган бўлиб, 59 ғалаба (39 тасини нокаут билан) ҳамда 2 тадан дуранг ва мағлубият қайд этган.