Андижон вилоятида иқтисодиётнинг юксалишида ишлаб чиқариш корхоналарининг ўрни ва аҳамияти тобора ортиб бормоқда. Айниқса, маҳаллий саноат корхоналарининг йирик ишлаб чиқарувчилар билан кооперация алоқаларини йўлга қўяётгани, иш ўринлари яратиб, ички бозор эҳтиёжини таъминлашга ҳисса қўшаётгани ҳудуд тараққиётида муҳим омил бўлиб хизмат қилмоқда. Бу жиҳатдан 2010-йилдан буён фаолият юритиб келаётган “Автокомпанент” МЧЖ фаолияти эътиборга молик. Мазкур корхонада бугунги кунда 750 нафар ишчи меҳнат қилаётган бўлиб, бу ерда ишлаб чиқарилаётган автомобиль эҳтиёт қисмлари “UzAvto Motors” корхонасига етказиб берилаётгани маҳаллий саноат кооперациясидаги узвийликни янада мустаҳкамламоқда.

2025 йил давомида корхона томонидан 6,8 миллион АҚШ доллари қийматидаги товарлар импорт қилинди. Шу билан бирга, корхонага 3 миллиард сўмдан ортиқ божхона тўловлари бўйича имтиёз берилган. Бундай иқтисодий қўллаб-қувватлаш чоралари ишлаб чиқаришни янада кенгайтириш, маҳсулот таннархини пасайтириш ва корхонанинг барқарор ривожланишига хизмат қилмоқда. Бу эса ўз навбатида маҳаллий саноат салоҳиятини мустаҳкамлаш, янги иш ўринларини сақлаб қолиш ва иқтисодий ўсишни таъминлашда муҳим аҳамият касб этмоқда.

Саминжон ҲУСАНОВ, “Халқ сўзи”.