Самарқандда Йўқолиб кетиш хавфи остидаги ёввойи фауна ва флора турларининг ноқонуний савдосига қарши кураш тўғрисидаги Конвенция (CITES) 20-конференцияси ўз ишини бошлади.

Халқаро анжуманнинг очилиш маросимида Ўзбекистон Республикаси Президентининг экология масалалари бўйича маслаҳатчиси - Экология ва иқлим ўзгариши миллий қўмитаси раиси Азиз Абдуҳакимов ва CITES Бош котиби Ивонн Игуеролар сўзга чиқди.

Қайд этилганидек, “CITES CoP20” ташкилотнинг 50 йиллигига бағишланган тарихий лаҳза бўлиб, унда табиат ва инсон биргаликда ривожланадиган келажакни шакллантиришга эътибор қаратилади.

Мазкур конференциянинг Самарқандда ўтказилиши халқаро ҳамкорликни мустаҳкамлашда муҳим қадам бўлиб, мамлакатнинг ёввойи табиатни асраш ва барқарор табиий ресурслардан фойдаланиш борасидаги қатъий позициясини тасдиқлайди.

Форумда 184 мамлакатдан ва Европа Иттифоқидан 3000 дан ортиқ иштирокчи, жумладан, давлат органлари, халқаро ташкилотлар, илмий ҳамжамият ва нодавлат сектори вакиллари иштирок этмоқда. Асосий эътибор биохилма-хилликни сақлаш бўйича глобал чора-тадбирларни кучайтиришга, йўқолиб бораётган турларни муҳофаза қилиш бўйича халқаро савдони тартибга солиш механизмларини такомиллаштиришга ва халқаро ҳамкорликни ривожлантиришга қаратиляпти.

Таъкидланганидек, Ўзбекистонда сўнгги йилларда ёввойи табиатни ҳимоя қилиш ва ноқонуний савдога қарши курашишда комплекс ислоҳотлар амалга оширилмоқда.

Хусусан, бир неча кун олдин Ўзбекистон Республикаси Президенти тарихий фармон имзолади, унда миллий экологик бошқарувни ислоҳ қилиш ва мустаҳкамлаш бўйича қўшимча чора-тадбирлар белгиланди. Ушбу фармонга мувофиқ, Экология ва иқлим ўзгариши миллий қўмитаси Президент ва Сенат олдида ҳисобдор бўлади. Қўмитага “Био-мерос”, “Яшил макон”, “Экологик маданият”, “Тоза ҳаво” ва “Чиқиндисиз ҳудудлар” каби миллий ташаббусларни амалга ошириш вазифаси юклатилди. Шунингдек, Экополиция ва атроф-муҳит мониторинги маркази ташкил этилиб, ёввойи ҳайвонлар ноқонуний савдоси, экологик жиноятлар ва флора ҳамда фаунага оид ҳуқуқбузарликларга қарши курашиш учун кенг ваколатлар берилди.

Анжуманда келажакдаги ҳамкорлик ҳақида гапирилар экан, рақамли технологиялар ва сунъий интеллектни ривожлантириш учун “Samarkand AI-Hub” маслаҳат платформасини яратиш, шунингдек, ноқонуний ёввойи табиат айланмасига қарши санкцияларни мувофиқлаштириш ва жавобгарлик чораларини кучайтириш механизмини ишлаб чиқиш каби бир қатор ташаббуслар таклиф қилинди.

5-декабрга қадар давом этадиган “CITES CoP20” доирасида ёввойи табиатни ҳимоя қилиш бўйича халқаро саъй-ҳаракатларни кучайтиришга қаратилган кўплаб ялпи йиғилишлар, Конвенция иловаларига ўзгартиришлар муҳокамаси, тематик тадбирлар ва юқори даражадаги учрашувлар бўлиб ўтади.

Абдулазиз ЙЎЛДОШЕВ

“Халқ сўзи”