Фото: Саида Мирзиёева / Telegram

Бугун, 5 август куни Ўзбекистон Республикаси Президенти ёрдамчиси Саида Мирзиёева Остонада Қозоғистон Республикаси Президенти Қасим-Жомарт Тоқаев билан учрашув ўтказди. Бу ҳақда Мирзиёеванинг ўзи ижтимоий тармоқдаги саҳифасида маълум қилди.

Қайд этилишича, учрашув давомида минтақавий ва халқаро кун тартиби атрофлича муҳокама қилинган. Шунингдек, Ўзбекистон-Қозоғистон ўртасида ахборот-мафкура, маданий-гуманитар, таълим ва ёшлар сиёсати соҳасидаги ўзаро манфаатли ҳамкорликни янада чуқурлаштиришга алоҳида эътибор қаратилган. 

«Суҳбат чоғида Ўзбекистон ва Қозоғистон ўртасидаги очиқ, ишончли ва дўстона мулоқот мисли кўрилмаган даражага кўтарилгани ҳамда мамлакатларимиз ўртасидаги стратегик ва иттифоқчилик муносабатларини мустаҳкамлашда беқиёс аҳамиятга эга экани таъкидланди», деб ёзади Президент ёрдамчиси.

Оқўрда матбуот хизматининг хабар беришича, учрашувда Қасим-Жомарт Тоқаев Қозоғистон ва Ўзбекистон ўртасидаги ўзаро ҳамкорликнинг иттифоқчи ва стратегик характерини қайд этиб, олий ва юқори даражадаги сиёсий мулоқотни самарали кенгайтириш учун Президент маъмуриятлари ўртасида яқин алоқаларни йўлга қўйиш муҳимлигини таъкидлаган.

Президент, шунингдек, Остонада «Заковат» халқаро интеллектуал ўйинлари ўтказилишини қўллаб-қувватлади ва бу каби тадбирлар халқларнинг маданий яқинлашувида муҳим лигини қайд этган.